Khliehriat Risaw 15: Ki Pulit Anti –Narcotics Task Force East Jaiñtia Hills District ba la lam khmat da kynhun pulit jong ka Umkiang Patrolling Post hynnin ka miet ha ka jingpynap shrip ha ka jaka kaba hap ha Lumshnong Police Station ki la ioh kurup noh ïa u drok uba don ka jingkhia 60 gram ba la thep hapoh ki san tylli ki synduk sabon.
Halor kane ki pulit ki la kem noh ruh ïa uwei u briew wan na ka thaiñ Silchar Assam uba wan da ka kali Hyundai Venue uba la suba donkti, uba la tip kyrteng kum u Abdul Rob Laskar alias Munna, 22 snem kyrta, uba na ka shnong Kabuganj, Silchar Assam.
Shuh shuh lyngba ka jingiatreilang sa bad ki pulit Anti –Narcotics Task Force Meghalaya, ki pulit ki la kem noh ruh sa uwei uba suba donkti uba la tip kyrteng kum u Asif Wahlang uba sah ha Hari Laban Shillong.
Nalor u drok, ki pulit ki la kurup noh ruh ïa i ka kali Hyundai Venue kaba don u registration number AS-01-EJ-8977.
Halor katei ka jingkurup drok ki pulit ki la register ejahar ïa ki suba don kti ha Lumshnong Police Station bad la pynngat hapoh ki kyndon aiñ NDPS Act bad ka jingtohkit ka dang iaid shakhmat.
