Nongpoh, Risaw, 14: Halor ka jingkam ka kynhun kiengatiar HNLC ba ka dei ma ka kaba la leit ban buh ïa u Bom IED ha ka phyllaw ïing u Ma Nehlang Lyngdoh ha Umsning ha Umsning, hynrei naduh ki trai ïing bad kumjuh ruh ki nongïalam Shnong ki ki la pynpaw ïa ka jingsngewkhia kaba jur kaba dei halor ka nongrim ba katei ka jaka ka dei ka jaka paidbah bad jaka iew paidbah ha kaba lada jia ba bthei utei u bom kan long ka jingshah ktah ïa ki nongshong shnong shnong.
Haba kren sha ki nongthoh khubor, u Bah Sunshine Makri kum u trai ïing bad uba dei u khun jong u Ma Nehlang Lyngdoh, u la ong ba kum ka ïing ka sem ha ka jingshisha kam don daw ïano ïano ruh bad ka long pat kaba sngewkhia ba ka jingwan buh ïa utei u bom IED ha katei ka jaka paidbah kan ktah shisha lada jia ba bthei shisha ïa ki nongshong shnong ka shnong Umsning hi baroh kawei.
U la pynpaw ruh da kaba ong ba kum ka ïing ka sem kam don jingtip satia kaei ka jingthmu ba wan buh ïa utei u bom ha katei ka phyllaw ïing bad kaba dei ka jaka paidbah bad kaei kaba kham sngewkhia ka long namar ba katei jaka ka dei ka jaka ba bun bha ki nongleit nongwan bad ki nongshong shnong kiba dei ki para jaid bynriew bad bun ruh ki ing ki sem jong ki para marjan.
U la ong ruh kum ka ïing ka sem, kim kwah shisha ban don kano kano ka jingjia kaba sngewsih ha kaba ki kwah tang ïa ka shongsuk ka shongsaiñ ki paidbah, namar baroh shi katta ki paidbah nongshong shnong ka thaiñ Umsning ki don hapdeng ka jingshongsuk shongsaiñ.
U la bynrap ruh da kaba ong, ba na ka liang ka ïing ka sem kam lah khlem da ai khublei kyrpang ïa ka tnad Pulit Ri Bhoi ha kaba ha ka jingïalam u SP bad ki ophisar, ïa ka kynhun bomb squad na Shillong, ka Umsning Town Durbar bad ka Dorbar Shnong Umsning Patarim, ba dei lyngba ka jingïatrei lang la lah noh ban lap ïa utei u bom IED ha ka por kaba biang bad ruh la lah noh ban pynduhbor ne pynsniew khlem da do kano kano ka jingjia kaba sngewsih kaba dei hi lyngba ka jingïatrei lang na baroh ki liang, u la bynrap.
Halor kane ka jingjia, na ka liang u Chairman ka Umsning Town Durbar u Bah Rocky Kylla bad u Rangbah Shnong ka Shnong Umsning Patarim u Bah K. Warjri, ki la pynpaw ïa kajuh ka jingsngew khia halor katei ka jingwan buh bom IED ha katei ka jaka paidbah bad ka jingsngew jongki kum ki nongïalam ka long ba ki da sngewkhia shisha lada jia ba bthei utei u bom kan long ka jingktah kaba jur ïa ki nongshong shnong hi baroh kawei.
Kum ki nongïalam ki la ai khublei ruh naduh u SP ka Ri Bhoi bad ka tnad Pulit, ka kynhun bomb squad na Shillong kiba la shim khia mardor, namar dei lyngba ka jingshim khia jongki, la lah ban pynduhbor noh ïa utei u bom uba long ka jingma ïa kiba bun ki mynsiem ba kordor ba la wan buh ha katei ka jaka paidbah, ki la bynrap.
