Nongpoh, Risaw, 14: Ki longïing na ka shnong Pahamlang 17mer ha ka thaiñ Byrnihat kiba la kylla long kum kita ki lanot shlei um ki la buh syndon da ka jingkyrpad sha ka sorkar, ki nongmihkhmat bad ïa u trai jaka kiba thmu ban pynieng ïa ka Weighbridge ha katei ka Shnong ba ki dei ban phai khmat lem bad ban ïa ki jingïarap halor kane ka jingshah ktah jur na ka jignshlei um.
Kumba la pynpaw sha ki lad pathai khubor, ki longkmie bad ki ïing kiba la shah ktah jur na ka jingshlei um, ki la ïathuh ba ka daw jong ka jingshlei um ki ïing ki sem ka dei tang na ka nala um kaba la rit eh ha ki bynta ba sharum ka shnong kaba dei hadien ka jingthmu ban buh ïa katei ka Weighbridge ba ka nala ka la dap na ka jingtih khyndew haduh ba la poi ka jingshlei um kaba la ktah shisha ïa ki ïing ki sem.
Ki la pynpaw ruh da kaba ong, ba shisien ba la hap slap la thikna ba kin ngat ha ka jingshlei um bad kane ka jingshlei um ka la pynjynjar bad pynsohsat ïa kitei ki longïing kiba mad ïa kane ka jingshlei um.
Namar kata, na ka liang kitei ki longkmie ki la buh ka jingkyrpad kaba jur naduh ka sorkar, ki nongmihkhmat paidbah bad ki trai jaka ba thmu buh ïa katei ka Weighbridge ban pynioh noh ïa ki lad jingïarap na ka bynta ki longïing kiba la shah ktah jur ha kane ka jingshlei um.
Shuh shuh, ha kawei ka bynta, ki la buh ruh ka jingkyntu ïa u trai katei ka jaka ban pynsted ha kaba kaba shna ïa ka nala um kaba la sahkut khyndew, khnang ba kum ki longïing ba shah ktah na kane ka jingshlei um kin nym mad shuh kajuh ka jingeh lada jia ba slap kaba ki ju mat la lai bnai ei ei ïa kane ka jingshlei um naduh ba la tih khyndew ha katei ka jaka ba thmu pynieng ïa ka Weighbridge.
