Mawpud, Risaw 13, 2025: Ka Federation of Khasi Jaiñtia & Garo People (FKJGP) Mawpud Unit mynta ka sngi ka la ïoh ban plie pyrda ïa ka lympung ïalehkai kynjatbol kaba la tip kum ka 2nd Football Tournament 2025 ha madan kynjatbol ha shnong Mawpud, South West Khasi Hills District.
Ha ka jingïalehkai kaba long hapdeng ka Myriaw Unit Football Club pyrshah ïa ka Khlur Rit Football Club, ka jingïakhun ka la long kaba itynnad bad ba tyngeh ba ki nongïalehkai ki la pyni kat lah i bor jong ki. Lah ban ong ruh ba ka jingïakhun ka la kut ha ka Tie Breaker, bad ka Myriaw Unit FC ka la jop da 4 – 2 kol pyrshah ïa ka Khlur Rit Football Club. Namar ha ka regular time kine baroh kynhun kata ka Khlur Rit FC bad ka Myriaw Unit FC kim shym la lah ban ïoh ban ïa thep kol wat kawei ruh.
Kham hashuwa kata, ki la pynlong ïa ka jingïalang lyngkot ba la pynïaid da u President FKJGP Mawpud Unit, u Bah Renol Thongni ha ryngkat ka jingïadonlang ruh u Secretary shnong Mawpud, u Bah Perfectson Wanniang, bad ki riewrangbah ka dong ka thaiñ.
Kiwei de kiba la sakhi lang na ka FkJGP ki long u Bah Kenesjune Nonglait, President FKJGP South West Khasi Hills District kum u Kongsan, bad u Bah Balse Kharbani, President FKJGP Ranikor Circle uba long kum u Symbud Kongsan, ryngkat u General Secretary FKJGP SWKH District.
