Jowai, Risaw 13: Ka lympung ïalehkai phutbol bala tip kum ka ‘Hajan Shylla Memorial Trophy 1st Division’ bala pynïaid daka Thadlaskeiñ Sports Association (TSA) West Jaiñtia Hills kala long mynta ka sngi 13 tarik u Risaw ha madan Wahiajer Multi-Sports Complex.
Haba phai sha ka jingïakhun ba nyngkong ka Khliehtyrshi SC kala pynliem da 3-1 kol ïaka Modymmai SC. Ïa ki kol naka Khliehtyrshi SC la thep da u Khrawkupar Kharsyntiew haka minit ba 29 & 55 bad u Helpmi Shylla haka minit ba 66. Ïa ka shikol kol na ka Modymmai SC la thep da u Wankit Pakma haka minit ba 40.
Haka jingïakhun kaba ar ka Larnai SC kala pynliem da 1-0 kol ïaka The A Team, lyngba ka kol jong u Enforceme Kharsohnoh (35).
La pyntip ka jingïakhun haka 1st Division lashai ka sngi nyngkong 14 tarik haka haka por 12 baje shiteng nohphai sngi ka Evergreen SC pyrshah ïaka Wahshangiar SC. Katba haka por 2 baje shiteng nohphai sngi ka Jalapang SC pyrshah ïaka Nongkhroh Mawsiang SC.
