Shillong, Risaw 09: U Bah Brightstarwell Marbaniang, MLA jong ka Mawlai Constituency, ha ka 08 tarik u Risaw, 2025 (sngi Balang), u la leit ban aiti da ka dorkhas hakhmat u Myntri ba thymmai jong ka tnat ïalehkai ka Sorkar Jylla u Bah Wailadmiki Shylla, ban kyntu na ka Sorkar Jylla ba kan pynurlong ïa ki phra tylli ki mat jingdawa, kynthup ïa ka jingdonkam ban maramot pynbha ïa ki jaka ïalehkai naduh ki madan, ki indoor stadium lem bad ka jingkyrshan ban ïarap na ka bynta ki klob bapher-bapher kiba don ha Mawlai.
Kat kum katei ka dorkhas, ka Mawlai ka mad ïa ka jingeh namar ka jingduna ki tiar bad ki madan ïalehkai kiba biang na ka bynta ki nongïalehkai ban kilanmet. Kiba bun ki samla kynthup ïa ki Sports Clubs ki ïaleh katba lah ban wad ïa ki jaka kiba biang. Watla ki don katto katne ki madan ha ki jaka bapher bapher jong ka Mawlai, kum ha Mawiong Rim, ha Mawiong Umjapung, Umthlong, ha Nongkwar, Mawroh, ha Mawkynroh, ha Umshing, ha Mawtawar, ha Umsaw, ha Nongkohlew, ha Mawsiatkhnam bad ha Umrynjah, hynrei kine ki madan baroh ki donkam kyrkieh ïa ka jingmaramot pynbha kum ka jingsiang ïa ki phlang kiba biang, ki nala pyntuid um bad ka jingker sawdong ïa ka madan.
La pynpaw ruh ba ki don khyndiat ki jaka ïalehkai indoor stadium ha Mawlai. Hynrei bun ki la sdang ban jot rathai kaba pynlong ïa ka jingbym shngaiñ bad ka bym bit ban pynlong jingïalehkai. Ka community-cum-indoor stadium kaba ha Mawiong Umjapung bad ha Nongpdeng ki la donkam ban maramot kyrkieh ban pynbha biang bad pynlong ïa ka ban treikam.
La ong ruh ba ka jingbymdon ki jaka ïalehkai kiba heh lane ki ‘Multi-Purpose Indoor Sports Complex, ka long ka jingkhanglad ban kyntiew ïa ki sap jong ki khynnah kiba don ka jingangnud ban kiew shaphrang ha ki jingïalehkai. Kumta na ka liang jong u Bah Brightstarwell u la kyntu ba ka la donkam ban tei ïa ka ‘Multi-Purpose Indoor Sports Complex’ kaba lah ban pdiang ïa ki jingïalehkai kum ka Badminton, Table Tennis, Voleyball, Basketball bad kiwei kiwei ryngkat ka jaka shong kaba biang na ka bynta ki nongpeitkai, ki jaka khreh bad ki jingdonkam kiba kyrpang.
Une u MLA ka Mawlai u la ong ruh ba ka donkam ïa ka jingthaw ïa ka madan phutbol kaba heh (standard-size) bad ki jingdonkam kum ki flood light, ka jaka shong ki nongpeitkai bad ka jingshna ïa ki athletic track ban kyntiew ïa ki jingïalehkai bapher bapher.
Shuh shuh u la pynpaw ruh ba bun ki Sports Clubs ha Mawlai ki ïakynduh jingeh ha ka liang ka jinglut jingsep bad kim lah ban pynneh pynsah ha ka jinglong kaba bha ïa ki jaka ïalehkai ba ki don lane ban pynbit pynbiang ïa ki tiar kiba donkam na ka bynta ki nongïalehkai jong ki. Namar kata, ki jingai jingïarap pisa kaba man ka por ka long kaba kongsan na ka bynta kine ki klob ban bteng ïa ka jingtreikam jong ki bad ban kyrshan ïa ka jingpynroi ïa ki khynnah samla kiba don sap ha ka jingïalehkai.
U la ong ruh ba ka jingthung ïa ki coach ba pura ha ki jingïalehkai bapher bapher kum ka phutbol, basketball bad athletic ka long kaba donkam. Ka long ruh kaba donkam ban pynlong ïa ki prokram wad sap (talent identification) ba man la u snem ban saiñdur ïa ki khynnah ba don sap na Mawlai bad ki jaka ba marjan.
U Bah Bright u la pynpaw ruh ïa ka jingdonkam ïa ka mang tyngka bad ka jaka ban kyntiew bad pynneh pynsah ïa ki jingïalehkai tynrai ha ka pateng. U la pynpaw ruh halor ka jingsam ïa ki tiar ïalehkai sha ki khynnah kumjuh ruh ka jingsumar kaba man ka por ïa ki tiar kiba la don lypa ha ki skul, ki shnong bad ki klob.
