U-19 Vinoo Mankad Trophy: Watla ïoh hat trick u Mewankitbok shah rem ka M’laya ha ka Sikkim

Shillong, Risaw 09: U Mewankitbok Kharpuri u la ïoh ban khur hat-trick ha ka jingïalehkai ba nyngkong jong ka Meghalaya ha ka U-19 Men’s Vinoo Mankad Trophy 2025-26 hynrei ka la mad pat ïa ka nam rem namar ba ka Sikkim ka la jop da 3 wiket ha ka jingïalehkai kaba la long ha ka sngi Palei, ha Chandigarh.
Ka Sikkim ka la jop ïa ka jingkynting pisa (toss) bad ka la aiti ïa ka Meghalya ba kan tied nyngkong ha kane ka jingïalehkai jong ka plate group. Haba shimti ïa ka pali tied ba nyngkong, ka Meghalaya ka la shah pynhap noh da tang 99 ron na ki 36.4 ober. Ka jingbeh kthong ïa ka ron ba la buh da ka kynhun Meghalaya ka long kaba eh hynrei ka Sikkim ka la jop da kaba pynsah sa 3 wiket ha ki 20.5 ober.
U Mewankitbok u la sei ïa ka sap kaba kyrpang ha ka boling, da kaba khur 4/48 ha ki 10 ober ba la mang ïa u, kynthup ïa ka hat-trick, kaba la wan ha ka ober kaba saw ha ka por ba dei ka pali tied jong ka Sikkim. U la weng ïa u nongtied ba nyngkong u Deepak na ka bynta 13 ron da kaba pynhap noh lyngba ka lbw, nangta u la pynlong ïa u kapten Denree ban shah kem ha u Benedict Jones Makdoh bad pynkhyllem ruh ïa u Sahil lyngba ka lbw, ha kaba baroh arngut kim shym la ïoh ban kamai ron.
Haba phai sha ka tied, ka jingnoh synñiang kaba khraw na ka bynta ka Meghalaya ka la wan na u Gaurav Narleng, da kaba kamai 33 ron na ki 36 tylli ki bol, kaba kynthup ïa hynriew tylli ki saw ron (fours). Ha ka por ba u la shah pynhap noh ka Meghalaya ka la kamai 57/4, hynrei ka la nang hiar shuh shuh sha ka 60/7 ha ka por ba u Angkit Tamang (16) bad u Benedict (11) ki la bynrap sa 30 ron na ka bynta u wiket uba phra ban pynjan ïa ka Meghalaya ban kynjoh ïa ka spah ron.
U Gaurav ruh u la khur 3/16 naki 4.5 ober ha ka inning tied jong ka Sikkim, kaba pynpaw ïa ka sngi kaba seisoh na ka bynta jong u, la ka long ka tied lane boling, hynrei u vice-kapten un jin da la kwah ïa ka jingjop na ka bynta ka Meghalaya.
Hynrei kane kam shym la lah ban long naba ka Sikkim ka la leh kat ban biang ban khur ïa ka jingjop. U Aadnan u la kamai bun eh da 27 ron bad u Inzamamul u la tied 21 ron.
Ka jingïalehkai ban wan jong ka Meghalaya kan long pyrshah ïa ka Manipur ha ka sngi Saitjaiñ.
Ha kawei pat ka liang, ha ka Senior Women’s T20 Trophy plate group, baroh ar tylli ki jingïalehkai ba la buh jong ka Meghalaya la pynsangeh noh namar ka jinglong jingman kaba sniew. Ia kane ka jingïalehkai plate group la pynlong ha Tripura bad ka Meghalaya ka la dei ban ïalehkai hynnin ka sngi Balang pyrshah ïa ka Manipur bad ïa ka Sikkim ha ka sngi Palei, hynrei ym shym la lah satia ban ïalehkai. Tang ar tylli na ki hynriew tylli ki jingïalehkai ba la buh por ki la ïohi ïa ka resol kaba mih.
Ka Meghalaya kan ïakhun pyrshah ïa ka Arunachal Pradesh ha ka sngi Saitjaiñ ban wan.