Jowai, Risaw 09: Ka West Jaiñtia District Sports Association, (WJDSA) Jowai mynta ka sngi 10 tarik u Risaw kan sdang ïaka lympung ïalehkai phutbol jong ki kynthei kaba la tip kum ka “1st Women League Football Tournament 2025” ïa kaba la pynlong ha madan Kiang Nangbah Stadium Dongmihsngi Jowai.
La ïathuh dang mynta u snem ka WJDSA kala sdang ïa kane ka lympung jong ki kynthei, kum shi bynta ban ai mynsiem ïaki khynnah kynthei hapoh ka District, khnang ba kin ïoh lad ban ïashim bynta lang ha ki jingïalehkai phutbol.
Kila don haduh 7 tylli ki kynhun kiba wan ban ïashim bynta ha kane ka lympung kiba kynthup ïaka Sabahmuswang SC, 7-Wasa United, Catholic Youth SC, Ladthadlaboh SC, Carpe-Dien FC, Q.C.S Women Football Club bad ka Spahmariang SC.
Lashai ka sngi sdang 10 tarik ki don haduh lai tylli ki jingïakhun, ka Sabahmuswang SC pyrshah ïaka 7-Wasa United haka por 11 baje mynstep, ka Catholic Youth SC pyrshah ïaka Ladthadlaboh SC haka por 12 shiteng nohphai sngi, Katba ka Carpe-Dien FC pyrshah ïaka Q.C.S Women Football Club haka por 2 baje nohphai sngi.
