Da 4-1 kol pynliem ka Mylliem ïa ka Nongrim Hills ha ka SPL 2025

Shillong, Risaw 08: Ki ar kol jong u Alem Khongwir ka la ïarap ïa ka Mylliem ban kyntiew noh ïalade na u laiñ saw jong ka thup kyrdan shah sloit (relegation zone) hadien ba ka la jop da 4-1 kol ïa ka Nongrim Hills ha ka Shillong Premier League 2025 kaba la long ha ka janmiet jong ka sngi Balang ha madan First Ground-SSA Stadium, Polo.
U Alem (36’, 50’), u Remark Kharmalki (65’) bad u Kevin Kurkalang (83’) ki la pynkhihjar na ka bynta ka Mylliem, katba u Bansynshar Kharshong (41’) u la thep na ka bynta ka Nongrim Hills.
Ka jingjop ka la rah ïa ka Mylliem sha ka kyrdan ba phra ryngkat ki 8 poiñ. Ha kawei pat ka liang, ka long kaba sngewsih na ka bynta ka Nongrim Hills, namar la thikna ba kane ka kynhun kan sa shah pynhiar noh ha kaba kut jong ka samoi ïalehkai. Na ka liang jong ka kynhun ka la pyrshang ban ïakhun tyngeh hynrei haduh ka kylla ba hynñiew ki la kamai tang 1 point, kaba pynlong ïa ki ban nym lah kiar na u laiñ saw (drop zone) wat lada ki jop ha baroh ar tylli ki jingïakhun ba dang sah jong ki.
Haba bishar ïa ka jingïakhun, ka rukom ïalehkai kala long kaba ïaid stet wat hapdeng ka jinglong jingman jong ka madan kaba sniew namar ka jingjur jong u slap ha kane ka sngi.
Ka kol kaba nyngkong ka la jia donbok na ka bynta u Alem, hadien ba u khlem shym la ïoh ban pynïasoh bha da ka kjat ïa ka bol pashat kaba la wan na liang kamon, hynrei ka jingpyrshang jong u ka la biang pat ban ïaid lait ïa u rangap kol ka Nongrim Hills u Kitboklang Marbaniang. Tang hadien san minit ka Nongrim Hills ka la pynïakhaid, lyngba u Bansynshar, kaba pynlong ïa ka kylla step ban ïakhaid da mar kawei (1-1).
Hynrei haba wanphai sha ka kylla miet, ka lyer jingjop ka la sdang ban beh sha ka Mylliem, ha kaba ka la ïoh ban thep sa lai tylli ki kol ba dang sah lyngba u Alem, u Remark bad u Kevin ban khur ïa ka jingjop bad ki lai poiñ ba kongsan kaba la pyllait ïa ka Mylliem na u laiñ saw (relegation zone).
Mynta ka SPL 2025 kan jam sha ka bynta kaba kongsan ha kaba ka jingïalehkai kaba khatduh ka la nangjan. Ka Shillong Lajong, kaba bat ïa ka nam lahduh, ka ïalam hakhmat ïa ka miej, bud sa ka Mawlai ha ka kyrdan ba ar. Watla baroh ar ki ïaryngkat poiñ (da mar 15), hynrei ka Lajong ka shim ïa ka kyrdan ba nyngkong katkum ka rekod jingjop pyrshah ïa ka Mawlai ha kane ka samoi (head-to-head). Haba hiar kham shapoh ha ka thup kyrdan, ka Sawmer ka don ha ka kyrdan kaba san hakhmat ka Rangdajied United katkum ka H2H. Ka jingjop jong ka Mylliem ha kane ka sngi ka la pynhap noh ïa ka Malki sha ka kyrdan ba khyndai ha ka miej da kaba sah sa ar tylli ki jingïalehkai ba kan hap ïakhun ban kiew shaphrang.
Ka kylla kaba phra (Round 8), kaba kongsan shuwa kaba khatduh, kan sdang naduh kane ka sngi Palei, 09 tarik Risaw, ha kaba ka Rangdajied kan aireng pyrshah ïa ka Mawlai ha ka por 4:30 baje janmiet.