Jowai, Risaw 08: Ka kynhun ïalehkai jong ka Lumphyrnai Sohphoh kala long syndon ka lahduh haka lympung phutbol kaba la tip da ka ‘Kesilroy Pala Memorial Trophy Super Division 2025’ bala pynïaid da ka Thadlaskeiñ Sports Association (TSA) West Jaiñtia Hills, hadien ba ka la jop ïa ka phainal kaba la long ha ka 07 tarik u Risaw, ha madan Wahiajer Multi-Sports Complex.
Ha kane ka jingïakhun phainal ka Lumphyrnai Sohphoh kala lah ban pynliem noh da 4-3 kol ïa ka Mukhla Raij daka jingïashut Tie Breaker, hadien ba ka jingïalehkai ka la kut ha ka jingïakhaid, ha kaba baroh ar kynhun kila ïoh ban thep mar shikol (1-1). ïa ka kol naka Lumphyrnai Sohphoh la thep da u Pynbiang Mynsong (60’), katba na ka Mukhla Raij la thep da u Welcome Sari (50’).
Ïa ka nam Top Scorer la ïoh rah da u Sumar Suting naka Lumphyrnai Sohphoh, Best Goalkeeper la ïoh da u Banshan Mukhim naka Mukhla Raij, Best Player da u Pynbiang Mynsong naka Lumphyrnai Sohphoh.
Ha kane ka sngi Final na ka liang u Symbud Myntri Rangbah ka sorkar jylla u ma Sniawbhalang Dhar ula long kum u kongsan, haka jingdonlang u bah Hamletson Dohling u President ka MFA kum u symbud kongsan, nalor u ma Wailadmiki Shylla myntri ka tnad ïalehkai Sports, u DSO Ka West Jaiñtia Hills ma Khroobok Passah, ki MDC ka JHADC bad ki nongkitkam ka MFA.
Na ka liang u ma Sniawbhalang Dhar haba ai jingkren ula ai ka jingïaroh ïaki nongkitkam ka TSA kiba la lah ban pynkhie im biang ïa kane ka Association, hadien bala jah da ki phew phew snem. Ula pyntip ruh na ka bynta ka Tournament ban wan jong ka Super Division ka TSA yn pynïakhun noh haka por mynmiet, namar hapoh kine ki 5 bnai ban wan yn shna noh ïaki floodlights hapoh ka Wahiajer Multi Sports Complex Stadium.
Katba u President ka MFA bah Hamletson Dohling ula ïaroh ïaka TSA kaba la lah ban pynïaid ïa ka League naduh ka 2nd Division, 1st Division, Super Division, shuh shuh ula ong kiba jop napoh ka TSA kin ïoh ban mihkhmat sha ka Meghalaya State League ka ban long ha u snem ba wan.
La ïoh ruh ka jingkren na u President ka TSA ma Kmenlang Shylla, katba ïa ka jingïalang la pynïaid da u ma Eberist Pariat uba dei u Vice President ka TSA. Ïa ki khusnam sha ki nongjop la sam da u ma Wailadmiki shylla kumjuh u bah Hamletson Dohling President MFA, nalor kiwei de.
