Nongpoh, Risaw 06: U Bah Mayral Born Syiem MLA ka Nongpoh mynta ka sngi u la leit ban plie paidbah ïaka Marmaiñ Circle Freshwater Fisheries Co-operative Society Ltd. ka sienjam ban kyntiew ïaki kam ri bad pynmih dohkha naka jylla lajong.
Ha katei ka sngi la sakhi ruh da ka jingdonlang ka kong Rona Khymdeit MDC ka Nongpoh, Bah Eric K Dkhar MDO ka Umling C&RD Block, ki dkhot jong ka society, ki nongioh jingmyntoi, ki rep bad kiwei kiwei.
Katei ka Society ka don kumba 16 tylli ki shnong ki ban peit bad khmih palat 400 tylli ki pung dohkha ban kyntiew ïaka kam ri dohkha da ka buit treikam kaba thymmai naka bynta ban kyntiew ïaka ioh ka kot ki nongri dohkha bad khamtam ban kyntiew ruh ïaka jingpynmih dohkha naka jylla.
Related Posts
Ha katei ka sngi la sam ruh ïaki symbai dohkha sha ki shnong bapher bapher kum ka dak ka jingai mynsiem ïaki shnong ba kin nang trei shitom bad tylli lang ban kyntiew ïaka kam ri dohkha bad ban pynmih ki dohkha kiba khuid bad kiba im na kane ka jylla.
Haba kren ha kane ka sngi naka liang u Bah Mayral Born Syiem MLA ka Nongpoh u la ai ka jingïaroh ïaka Marmaiñ Circle Freshwater Fisheries Co-operative Society naduh ki nongïalam bad ki dkhot kiba don hapoh jong ka kiba la trei shitom ban shim ïa katei ka sienjam ban kyntiew ïaka ioh ka kot ki nongri dohkha bad khamtam ka jingkloi jong ki ban tylli mlon naka bynta ban kyntiew ïa kane ka ri bad pynmih dohkha.
Shuh shuh kum u MLA u la kyntu ruh ïa kitei ki nongïalam bad ki dkhot katei ka society ba kin nang trei shitom shuh shuh ban dang leh ki kam ba bha khamtam ban kyntiew ïaki nongrep bad ki nongri dohkha ha katei ka thaiñ.