Nongpoh, Risaw 05: Haba leit ban pynskhem bad pynbam smai ïa ki nongïalam ba thymmai ka Federation of Khasi Jaiñtia and Garo People (FKJGP), Baridua Them Marwet Circle ha ka sngi Saitjaiñ, u President ba rangbah ka FKJGP u Bah Dundee C. Khongsit, u la buh ka jingkyntu jur ïa kine ki nongïalam ba thymmai ka Circle ba kim dei ban ailad satia ïa ki bar jylla ba kin wan tuklar ha ki kam khaïi pateng bad khamtam ki shnong ba hap ha katei ka Circle ki don ha khappud ka Meghalaya bad ka Assam.
Kum u nongïalam ba rangbah ka seng FKJGP, u Bah Dundee C. Khongsit, u la ong ba ka nongrim jogn ka seng ban pynïar ne pynkhlaiñ ïa ki jingshakri lyngba ki Circle bad ki Unit, ka long ban peit kyrpang na ka bynta ki trai muluk ki trai jylla, ba kim dei ban shah thombor la ka long ha ka kam khaïi pateng, ha ka kam synshar khaddar ne ha ka jinglong trai ïa ka khyndew ka shyiap.
“Nga dap ruh da ka mynsiem jong ka jingkmen ba ki samla na ki shnong ba hap ha kitei ki shnong khappud ki la wan ban pynïasoh soh sha ka FKJGP ban long kum kita ki shipai ka jaid bynriew, namar ka nongrim ka seng FKJGP lyngba ka jingdon ki Unit bad ki Circle ha kylleng ka jylla ka long ban peit kyrpang ïa ka eh ka shon ki trai muluk ki trai jaka” ong u Bah Khongsit bad bynrap ruh lyngba ka jingdon kine ki nongïalam ha kine ki shnong khappud ki dei ruh ban pynthikna ban ïada ïa ka khyndew ka shyiap bad ruh ïa u pud u sam ba kim dei ban ailad ban wan kyntur beaiñ sha pud u sam ka jylla kumba ka Assam ka ju thom bor ha kiba bun ki snong khappud ka Meghalaya bad ka Assam, u la bynrap.
U la ai mynsiem ruh ïa kine ki nongïalam ba thymmai ka FKJGP Baridua Them Marwet Circle ba ki dei ban shim ïa kata ka jingkitkhlieh kumba ki la rai ban long kita ki dkhot ba pura ha ka seng, namar ka jingdon ka seng FKJGP kam dei satia ban ïoh jingmyntoi ki nongïalam ne ki dkhot bad lyngba ka jingdon ka FKJGP ka jingmyntoi ka dei ban leit sha ki trai muluk ki trai jaka, u la bynrap.
Ki nongïalam ba thymmai ka FKJGP Baridua Them Marwet Circle ba la pynbam smai bad pynskhem da u President ba rangbah ka seng ki kynthup ïa u Bah Denis Nongrum kum u President, u Allan Donald Sohpdang General Secretary, u Mickey Lyndem Vice president, u Starwell Majaw kum u Assistant general Secretary lem bad kiwei kiwei ki nongïalam bad ki dkhot ki ban treikam na ka bynta ka samoi treikam jong u snem 2025 haduh u snem 2028.
Ïa kane ka jingpynbam smai bad pynskhem ïa ki nongïalam ka FKJGP Them Marwet Circle la pynlong ha Dorbar Hall ka Shnong Baridua, ha kaba nalor u President ba rangbah ka seng u Bah Dondee C Khongsit, kiwei kiwei kiba la ïa don lang ki kynthup ïa u Bah Luistar Lyngdoh President ka NKHD, u Bah Ricky Majaw General secretary, u Samla Kitbor Suting Chief organising secretery, u Bah Lumlang Mawnai Senior Vice President, u Paiem Ken Syiem Syiem ka Raid Marwet, u Rangbah Shnong ka Baridua u Bah Ioanis Narleng lem bad kiwei kiwei ki nongïalam shnong bad na ka seng.
