Ïap 20 ngut, shah rong bun tylli ki ïing na ka jingtwa khyndew ha Darjeeling

Darjeeling, Risaw 05 : Ka jingther jong u lapbah uba jur ka la poi haduh u pud ba ka jingdon kiba duhei ïa ka jingim ka la kot sha ka 20 ngut ei ei naka daw ka jingtwa khyndew kaba la jïa kylleng ki bynta jong ka Mirik bad Darjeeling Hills ha West Bengal ha kane ka sngi U Blei.
Ha kane ka jingjia, la ong ba bun tylli ki ïing ki la shah rong bad bun tylli bha ki surok kali kiba la julor lut kaba pynlong ïa bun tylli ki shnong ban sahkut lut ka leit ka wan. Ym tang katta la ong ruh ba ki don bun bha ki nongjngohkai pyrthei kiba dang sahkut na ka daw ka jingtwa khyndew.
Katkum ki khubor na ka NDRF bad ki bor distrik la ong ruh ba ki la ïoh pdiang ïa ki jingtip na kylleng ki jaka kynthup naduh ka thain Sarsaly, Jasbirgaon, Mirik Basti, Dhar Gaon (Mechi), Nagrakata bad bynta jong ka Mirik Lake.
Da kaba kam ba ka jingduh ka jingim ki briew ka la jur bha na ka liang u Myntri ka North Bengal Development, u Udayan Guha u la ong ba ka jinglong jingman ka dei kaba la jur bha.
“Kumba ka long mynta hi, ka jingdon kiba khlad na kane ka jingjia ka la kot sha ka 20 ngut u la ong bad ka lah ruh ban nang kiew,” u la ong da kaba pyntip ba ma u ruh u dang don ha lynti ban leit sha kitei ki jaka ba shah ktah.
Ki khubor na ka NDRF pat ki ong ba ki la don kumba 11 ngut ei ei ki briew kiba la khlad tang ha ka thain Mirik kaba dei ka thain kaba shah ktah jur eh ha katei ka jingtwa khyndew bad hynniew ngut pat kiba la mynsaw la ïoh ban pyllait im.
Shuh shuh la ïathuh ruh ba ha Darjeeling pat ki la don 7 ngut ki briew kiba la khlad bad ka jingwad ïa ki briew kiba jah ka dang ïai bteng da ka jingïatrei lang bad ki pulit kumjuh ki bor distrik bad ka disaster response team.
“Ki la don haduh 7 ngut kiba ïap ha ka jingtwa khyndew ha Darjeeling Sub-Division na ka daw ka jingther jur jong u slap hynin ka miet bad mynta ka jingleit wad ban ai jingïarap ka dang ïai bteng, ” ong u Sub Division Officer ka Darjeeling u Richard Lepcha.
Halor kane ka jingjia na ka liang ka Myntri Rangbah ka Darjeeling ka la pynbna ba kan ai ïa ka bailuksan sha kito ki lanot kiba ngat ha katei ka jingjia ba sngewsih. Ka la ong ruh ba kan sa leit ban jngoh ïa kitei ki jaka ha ka 06tarik mynta u bnai.
Na ka liang u Myntri Rangbahduh ka Ri, u Narendra Modi u la phah ka jingsngewlem sha ki lanot kiba kynduh ïa katei ka jingjia bad ong ba ka sorkar ka peitngor ïa ka jinglong jingman ïa katei ka jingjia.