Pyndem toiñ ka Hamas hapoh ki kyndon u President Trump, mynjur ban pyllait ïa kiba shah rahbor

Shillong, Risaw, 04: Ka seng lehnoh Hamas ha ka sngi Thohdieng ka la pyndem toiñ da kaba pynbna ba ka la mynjur ban pyllait noh ïa baroh ki Jew kiba la shah rahbor, la ka long ïa kiba la ïap bad ïa kiba dang im, hapoh ki kyndon ba la tyrwa da u President ka ri America u Donald Trump bad pynpaw ruh ïa ka jingkloi ban wan sha ka miej jingïakren.
Ha u kyrwoh, ka seng lehnoh Hamas ka la ong ba ka la mynjur “ban pyllait noh ïa baroh ki koidi nong Israel, kiba dang im bad kiba la ïap, katkum ki kyndon ïa kylliang ba la tyrwa da u President Trump, lada pyndep ïa ki kyndon kiba biang na ka bynta ki jingïakylliang.”
Kane ka jingpynbna ka la wan tang hapoh khyndiat por hadien ba u Trump u la ai por khatduh ïa ka seng lehnoh Hamas, da kaba maham lymda ka mynjur ïa ka jingïateh kular jingsuk bad ka Israel shwa ka 6 baje janmiet sngi u Blei katkum ka por jong ka Washington DC time, ki jingeh ki bym pat ju jia mynno mynno ruh kin bud nadien.
“Dei ban ïasoi ïa ka jingmynjur bad ka Hamas haduh ka janmiet Sngi U Blei ha ka por HYNRIEW (6) baje janmiet., ka por jong ka Washington, D.C. Kawei pa kawei ka Ri ka la soi! Lada ym lah ban pynurlong ïa kane ka jingïasoi kaba la aipor khatduh, baroh ki DUJOK, bym pat ju ïohi mynno mynno ruh, kin bthei pyrshah ïa ka Hamas. KAN DON KA JINGSUK HA MIDDLE EAST,” la thoh u Trump ha ka Social Media.
U President ka US u la kyntu ïa ki nong Palestine ba kin mih noh na ki jaka ba shah ktah ha Gaza, kiba la mad ïa ka jingshah ther bom ha ka Israel naduh ba la jia ka jingshah hiar thma ha ka 7 tarik, Risaw.
“Nga kyntu ïa baroh ki nong Palestine ba luilui ba kin mih noh na kane ka thaiñ bad ban leit sha ki jaka kiba shngaiñ. Yn sa ai jingïarap ïa iwei pa iwei na ka bynta kito kiba dang ap ïa ki lad jingïarap. Donbok palat ïa ki Hamas, hynrei lym kumta yn ai lad khatduh eh ïa ki,” u la ong
U Trump u la pynpaw ba ki 20 tylli ki mat halor ka jingwanrah biang ïa ka shongsuk shongsaiñ ha Gaza, kaba u kam ba ka dei kaba la mynjur da Israel, ka US bad kiwei kiwei ki bor. U la ong ruh ba kane kan long kum ka jingsah kynmaw ban pynkut noh ïa ka jingïausnam kaba la neh da ki spah snem ha ka thaiñ.
Na ka liang jong ka United Nations ka la pdiang sngewbha ïa ka jingpynbna ka seng lehnoh Hamas bad pynshlur ruh ïa ka Hamas ban long kaba kloi ban pyllait noh ïa ki nongshah rahbor bad ban poi sha ka jingïakren ïasuk.
Kum ban shu pynkynmaw, ha ka 7 tarik, Risaw, 2023, ki lehnoh Hamas ki la hiar thma kyndit ïa ka Israel, kaba long kawei na ki jingshah hiar thma hadien ka jingïakynad ki nong Israeli bad bad ki nong Palestine naduh ka jingkhie ka thma Arab-Israeli ha u snem 1948
Ka jingshah hiar thma ka la jia ha ka Simchat Torah kaba dei ka sngi khuid kaba ki Jew ki ju rakhe. Ki Hamas ki la siat palat 4,000 tylli ki namding sha ki bynta ka ri Israel. Ki lehnoh Hamas ki la pynpra ruh ïa ki jingker sainar ha Gaza-Israel ha ki 119 tylli ki jaka bad rung jubor sha ki 21 tylli ki shnong kiba shong basah da ki nong Israel, ba kynthup ha Be’eri, Kfar Aza bad ha Alumim.
Ki lehnoh ki la khyrwit naphang ïa ki ktem sah ki shipai ha khapud bad ïa ki jaka sah ki riewpaidbah ha kaba 1,195 ngut ki briew ki la ïap, ba kynthup ïa 736 ngut ki nong Israel, 79 ngut ki bar ri, 379 ngut ki Pulit pahara. Nalor kata, sa kumba 250 ngut ki la shah rahbor sha Gaza, ba kynthup ïa ki riewpaidbah bad ki shipai.