Nongpoh, Risaw 04: Ka kong Rona Khymdeit haba leit ban shim bynta haka prokram pynkhuid shnong mynta ka sngi haka shnong Nongpoh kaba dei ka jaka pdeng jong ka Ri-Bhoi kala kyntu ïaki paidbah nongshong shnong baroh ban shim ïaka khuid ka suba kum ka jingpynmlien ym ban pynlong tang ka tamasa ba shisien shisnem.
Ka la ong ruh ba bunsien ka pynkhuid ïaki shnong ki thaw ka ju long tang ka tamasa ba shisien shisnem hynrei ki paidbah ki dei ban sngewthuh shai ba ka jingkhuid ka long kaba kongsan haka jingim jong u briew ba man ka sngi bad kane kan wanrah ïaka jingitynnad ka shnong ka thaw bad ki jaka iew.
Naka liang ki paidbah nongshong shnong jong ka Nongpoh mynta ka sngi kila mih ryntih ban pynlong ka jingpynkhuid shnong ha manla ki kyntoit bad ki kyndong kynshrot jong ka shnong khamtam ha surok bah National Highway 6 kaba dei ka jaka ba bun ki dukan bad ki nongleit nongwan.
Lah ruh ban kdew hangne ba bun hi ki paidbah kim burom ïaki jaka paidbah ban leh dusmon da kaba bret pathar ïaki jaboh jabaiñ, ban bret na jrong kali ïaki plastic bad ki jaboh bad kumjuh ruh ka jingleh khuid ka long tang haka sngi pynkhuid shnong lait nangta haki sngi ba bud la long biang kumjuh, na ka liang ka Dorbar Shnong Nongpoh kala buh ka jingkyrpad ïaki paidbah ba ki dei ban shim ïaka jingkitkhlieh man uwei pa uwei u briew naka bynta ban wanrah ïaka khuid ka suba jong ka shnong ka thaw khamtam ban wanrah ka jingitynnad bad kumjuh ka koit ka khiah.
