Lyngba ka tnat DPMU-Basin, la pynsngew ïa ka jinglah ki shiphew ngut na EJHD kiba la poi sha ki thong bapher bapher, lyngba ka jingiatreilang bad ki tnat sorkar

0

Khliehriat Jylliew 30: Ka District Project Management Unit jong ka Meghalaya Basin Management Agency East Jaiñtia Hills District, mynta ka sngi ka la khot pynlong ïa ka prokram ba kyrpang kaba la pynsngew sha ki paidbah ïa ka jinglah ki shiphew ngut ba kynthup ki kynhun bad ki Dorbar Shnong ban poi sha ki thong bapher bapher ban kyntiew ïa ka longbriew man briew bad ka imlang ka sahlang bad ka ïoh ka kot, kaba la khot ha ka ktien nongwei “Knowledge Sharing Event of Best Practices”
U Deputy Commissioner ka East Jaiñtia Hills District, u Abhilash Banarwal, IAS, uba long u kongsan ha kane ka prokram, u la pynpaw ka jingsngew kmen ban ioh kum kane ka lad ha kaba kine ki ba la poi sha ka thong ki lah ban iasam lem ïa ki buit ki sap jongki sha kiwei pat, halor ka jinglah jong ki ban kyntiew ïa ka ïoh ka kot, ka bha ka miat, ka khuid ka suba ha ki shnong ki thaw bad ha ka imlang ka sahlang, u la ong ruh ba ka East Jaiñtia Hills District ka long kaba donbok shibun bha namar ka jingdon ki heh sorkar kiba trei shitom, kiba kloi ban iarap, ban iatreilang, kiba na ki tnat sorkar bapher bapher, namar ba ka jylla Meghalaya ka dang dei ka jylla kaba dang bun kiei kiei kiba dang hap wanrah na shabar ka jylla, kumta u la kyntu ïa ki paidbah ba kin shim ïa ka kabu ban wan sha khmat ban iatreilang bad ki tnat sorkar ban dup lah ban kyntiew shuh shuh ïa ka ioh ka kot, ka roi ka par, ka bha ka miat, ka khuid ka suba bad ban kyntiew ruh ïa ka khaiï ka pateng.
Ha kaba iadei bad ka skim pynlang um (Water Conservation & Irregation) ba la pyntrei da ka Village Employment Committee Iongkaluh, u Secretary VEC, u bah Pynshngaiñlang Kyndait u la iathuh ba ka VEC ka la shim ïa ka tyllong um na kawei ka wah rit ka ‘Thwai Thlen’ bad ka VEC ka la shna da ki check dam kiba paka bha, ïa ka um la shna ha kata ka rukom ba ki briew ki lah ban pyndonkam ha kiba bun ki bynta bad ha kajuh ka por ïa ka um la pyniaid ruh sah ki lyngkha, ki hali na ka bynta ka rep ka riang, ïa kane ka check dam la iarap synrop lang ruh da ki skim na ka MrghaLAMP bad ka skim jong ka MGNREGA, la ong ba kane ka la ïarap shi katdei eh ha kaba kyntiew ïa ka rep ka riang ha shnong ha thaw.
U Secretary jong ka Villagae Employment Committee Jalyiah, u bah S.Dkhar, u la ïathuh ba ïa kane ka IVCS la register ha ka 4 tarik u rymphang 2021 tang 360 ngut ki dkhot, hynrei tang hapoh ki kyndiat bnai kane ka kynhun IVCS ka la kiew irat bad kynthup ïa ki 345 tylli ki long iïng, kane ka kynhun ka dei kaba ki ju pynlang pisa bad ai ram pisa ïa ki para dkhot ban kyntiew iwei ïa iwei pat, la ong ba ka pisa kaba don mynta ka la kot haduh T21,25,000 (arphew wei lak ar phewsan hajar tyngka) bad ka pisa kaba la ai ram ka dang don T.6,22,000 tyngka (hynriew lakar phaew ar hajar), lah ban ong ba kane ruh ka dei kawei na ki lad ban kyntiew ïa ka roi ka par.
Ka Secretary jong ka kynhun ‘Shankylliang Producer Group Sohkymphor, ka kong Jency Suchiang, ka la iathuh ba kane ka kynhun ka dei kawei na ki nuksa na ka bynta ban kyntiew ïa ki kynthei kiba dop ka sap ban shna jingshna da ki kti bad ki ju iatrei lang kum ka kynhun ban kyntiew iwei ïa iwei pat ha kaba ïa ki jingshna ba ki shna la ju pyni nam ha ki Mela, ki ïew pyni nam ba la pynlong ha Khliehriat bad ha Latyrke bad ha ka International Buyers and Sellers Meet ba la pynlong ha Shillong, la khmih lynti ba kane ka kynhun SHG na Sohkymphor kan nang ïai kiew na ka por sha ka por.
U Waheh Shnong jong ka shnong Mukhaialong, u bah Hunderd Phawa, u la kren halor ka lah ban pynbha pat ïa ka wahduid ba ju tip kum ka Moolawar kaba don ha shnong Mukhaialong ka bym long shuh ban pyndonkam la bun bun snem kaba na ka daw ka jingtih dewiong, hynrei da ka jingiatreilang ki bor shnong ba kynthup ki Committee shnong ryngkat bad ka tnat MINR, ka MBDA ha u snem 2017 da kaba pyndonkam da ki maw shun ïa ka um ha kane ka wah la lah pat ban pynkhuid bad mynta ka la kylla bha kam long acid shuh bad ka la long ka jingmyntoi ïa ki 170 tylli ki longiïng kiba pyndonkam um na ka wah rit Moolwar.
U Assistant Waheh shnong Moolamylliang, u bah Damewanhi Rymbai u la pynsngew halor ka jinglah ka shnong Moolamylliang ban wanrah ïa ka khuid ka suba kaba la sdang naduh u snem 2014 haduh ban kan da ioh ïa ka nam kum ka shnong kaba khuid tam ha ri lum Jaiñtia, u la kren ruh shibun kiei kiei kiba iadei bad ka khuid ka suba.
U bah Sunshine Ryngkhlem, uba na ka shnong Wapung Skur, u dei uwei na ki nong ri sniang ba paw ha East Jaiñtia Hills District bad u la sdang ïa kane ka kam naduh u snem 2006 bad mynta u ri haduh san phew tylli ki sniang, u ri ruh ïa ki ngap bad die ïa ki um ngap, kine ki kam ki la iarap ïa u ha ka ioh ka kot bad ka kamai kajih.
Ka kong Ïahphang Dkhar, ka nongrep soh strawbarry kaba na ka shnong Tuber Sohshrieh ka la pynsgew ïa ka jingiaid lynti jongka ha kane ka kam rep soh, ha kaba ka la die ïa ki soh bad mynta ka la lah ban pynmih ruh ïa ka umsoh bad ka don ruh la ka jong ka Processing Unit, kane ka la ïarap ban kyntiew ïa ka kamai kajih jong ka na ka por sha ka por.
U bah Marius Tlang, uba na ka shnong Umrangso, une ruh u dei u nong ri sniang bad u nong rep soh trun uba la kiew bha bad uba la ioh shibun ki jinghikhai na ka tnat ICAR bad mynta u la rep haduh 30,000 tylli ki tynrai sohtrun bad shibun ki sniang ruh u ri.
U bah Serious Dkhar, uba na Ladwah Wapung, u la pynsngew ïa ki jingiaid lynti jong u kum u nongrep syntiew, uba la pyndep ruh ïa ka jingshah hikai na ka tnat ICAR ha u snem 2019 u la plie ïa ka dukan die syntiew ha Ladrymbai.
Ka kong Kyrsiew Ryngkhlem, kaba na shnong Wapung Skur, ka dei ka longkmie kaba shna ïa ki sboh ban thung jingthung (sboh organic) bad ong ba mynta ki la bun bha ki briew kiba wad ïa kane ka sboh ba ka shna namar ba ka long ka sboh kaba bha ban thungjingthung, kumta kane ka jingdie jongka ïa ka sboh organic ka dei ka lad kamai kaba kyntiew ïa ka ioh ka kot jong ka.

Leave A Reply

Your email address will not be published.