Jowai, Risaw 03: Ka Dorbar Shnong Loomkyrwiang, Jowai ha ka sngi Thohdieng ka la pynkup burom ïa u Myntri ka Sorkar jylla u Bah Sanbor Shullai uba long ruh u MLA jong ka South Shillong Constituency.
U Bah Lammat-oo Laloo u la pynpaw ïa ka jingsngewkmen ba u khun jong ka shnong ula ïoh bat ïa ka kyrdan Myntri bad u la pynkynmaw ruh ïa ki kam kiba ka shnong ka ladep ban ïaid lynti lyngba ka jingïarap jong u Bah Sanbor Shullai da kaba kitbok ba un dang ai ka jingshakri kaba bha tang ha ki sngi ki ban dang wan.
U Bah Sanbor Shullai haba ai jingkren ula ai ka jingïaroh ïa ka shnong Loomkyrwiang kaba la shim ïa kane ka bynta ban pynkup burom ïa u bad kum u Myntri ula kular ban ïarap katba kot ka bor hadien ba u Waheh Shnong u la aiti da ka dorkhas jingkyrpad ban pynbha ïa ka Sound System jong ka Dorbar Hall kaba la kot 38 lak katkum ka Details Project Report (DPR).
U la ong kum u Myntri Sorkar ha ka jingtreikam ‘un pynduna ïa ka ktien bad un pynbun da ka kam’ ym kumba long kiwei kiba heh tang ka ktien sha ki jaka paidbah.
U la ong kum u Myntri na kawei pat ka Constituency kam long kaba suk ïa u ban pynïoh jingïarap katkum ka jingdawa, hynrei un pyrshang ban ïakren ïa kane bad u MLA ka Jowai Constituency da kaba phah ïa kane ka jingdawa sha ka tnad Sorkar ba kan ïoh leh ïa kaba donkam.
Kum ka jingleh burom la pynphong ha u Bah Shullai da ka jaiñspong bad ka jingaiti ïa ka memento kum ka dak ban sha jingkynmaw.
Hadien kane, u Bah Shullai u la plie ïa ka Fete jong ka shnong bad u la ai khublei kitbok ktiwiang ba ka shnong kan ïohnong na kane ka Fete.
