Pynliem ka Ryntih SC ïa ka Mawkhar SC ha ka Shillong Premier League

Shillong, Jylliew 30 : Ka Ryntih SC ka la pynliem da 3-1 ïa ka Mawkhar SC ha ka jingïalehkai ba 11 jong ka lympung OC Blue Shillong Premier League 2021-22 ha ka sngi Palei ha madan Third Ground, Polo.
Haba phai sha ka jingïakhun hapdeng kitei ki ar tylli ki team, ka jingïalehkai ka long kaba mar ïabam ha kaba baroh ar ki kynhun ki la ïakhun tyngeh da ka thong ban khur ïa ka nam jop hadien ba ki la mad nam rem ha ki jingïalehkai ba lah dep.
Ha jingïalehkai jong ka kylla step baroh ar kynhun ki la ïakhun tyngeh ban thep kol bad bun tylli ki kabu ki la pynlehnoh ei bad ka jingïalehkai ka la kut noh khlem da don ba lah ban thep kol.
Haba wanphai sha ka kylla miet, ka Mawkhar ka la ïoh nyngkong ïa ka kabu thep kol hynrei ka bol ba la shut da u Justerwell Tham ka la dei noh ïa u rangïalehkai ka Ryntih kaba la lait noh sharud bad ïoh ïa ka corner.
Hapdeng ka jingïakhun kaba ïakhaid bha, pynbna ka Ryntih ka la ïoh ban plie pyrda nyngkong lyngba ka kol ba la thep da u Bickyson Kharkongor ha ka minit ba 48 lyngba ka jingïarap ai thep kol u Dawanplielad Myrchiang.
Lyngba katei ka shi kol ka la nang ai mynsiem ïa ki rangïalehkai ka Ryntih kaba la ïakhun tyngeh beit triang bad tur beit sha ka kut jong ka Mawkhar bad ha ka minit ba 58 u Bickyson Khar-kongor u la thep sa ïa ka kol kaba ar kaba la pynkskhem ïa ka kynhun ban lah bat bol bha.
U Bickyson Kharkongor u la thep ïa ka kol kaba ar lyngba ka shut corner ïa kaba u rangap kol ka Mawkhar u Widenstar Kharsati u khlem lah shuh ban kyrda ïa ka bol ba la thep da u Kharkongor najan ka dieng kol.
Ka Ryntih ka la nang pynkhlaiñ bad khlem da ailad ïa ki jingpyrshang thep kol ka Mawkhar watla ka la pashat bol bad tur sha ka kut jong ka Ryntih. Ka jingïalehkai ka la sdang ban lah shiliang ha kaba ka Ryntih sa shisien ka la ïoh ban lehkmen ïa ka kol kaba lai ba la thep da u Banehskhem Khongsdam ha ka minit ba 60 kaba khlem artatien shuh ban khur ïa ka jingjop.
Bad shwa ban kut ka jingïalehkai tang ban leit thylli u Hardy Cliff Nongbri u la thep ïa ka shi kol na bynta ka Mawkhar SC (90’+3). Kumta lyngba kane ka nam jop ka Ryntih SC ka la khur pura ïa ki lai point bad khur mynta da 6 point. Haba phai sha kine ki ar tylli ki team, ka Ryntih ka la jop ha ka jingïalehkai kaba nyngkong da kaba pynliem da 3-0 ïa ka Malki katba ka Mawkhar ka ïakhaid bad khlem jop shisien ruh ha ka jingmih madan nyngkong jong ka ha ka lympung OC Blue SPL bad don ha trai duh na ka miej kheiñ pont da 1 point.
Mynta ka sngi ka jingïalehkai kan long hapdeng ka Mawlai SC pyrshah ïa ka Shillong Lajong FC kiban ïakhun ïa ki minit ba dang sah hadien ba ka jingïalehkai ba dang shen kata ha ka 21 tarik Jylliew la pynpep noh shwa ha ki 62 minit na ka daw ka jinglang um ka madan. Ka Mawlai ka la lamkhmat da 1-0 bad ka jingïalehkai kan sdang ha ka por 4:30 janmiet.