Kumba pynkut ïa ka mat tih Uranium pynkut noh sa ïa ka mat kajia pud, dawa ki paid Langpih

Nongstoiñ, Nailur, 30: Watla ka sorkar Meghalaya bad ka sorkar Assam ki la dep thung ïa ki Regional Committee on Border Dispute bad la ai jingbit ruh ïa ki, ba kin leit ban jurip ïa ki jaka bad ki shnong ki thaw shuwa ba ki Myntri Rangbah jong ki ar tylli ki jylla kin ïakynduh biang ban pynbeit ïakren pynbeit ïa u pud u sam, hynrei haduh mynta ym shym pat la lah ban pynurlong.
Ha kaba ïadei bad ka jingpynsahteng ïa ka jingpynbeit pud ha West Khasi Hills, ki riew rangbah kiba hap ha ka Langpih sector kata naduh ki Khasi, Garo bad Nepali, ki la pynpaw ïa ka jingsngew lyngngoh namar ba u Conrad K.Sangma Myntri Rangbah ka jylla ha ka taiew ba la dep, haba u bujli Myntri u bah Paul Lyngdoh u ba dei u Chairman jong ka Regional Committee na ka bynta ka West Khasi Hills u la shah weng na ka ka shuki Myntri. Hynrei u Myntri Rangbah u khlem pynshai sha ki paitbah la u bah Paul u dang neh kum u Chairman ka Regional Committee ne u la bujli da uwei pat. Lada u la bujli da uwei pat ruh u dei ban pynshai ïano u la thung.
U Bah S.P.Nongphud uwei na ki riew rangbah na ki shnong Khasi, u la ong ba imat u Myntri Rangbah u la klet ba ha ka jingpynbeit ha ka wat kaba nyngkong ha West Khasi Hills dei tang ki jaka kiba hap ha ka Hahim sector, kiba la dep ban pynbeit katba ïa ki jaka kiba hap ha ka Langpih sector pat ym shym pat la pynbeit satia.
Nalor kata u la ong ruh ba dang shen ki paitbah ki la ïohi lyngba ki lad pathai khubor, ba u bah Prestone Tynsong Symbud Myntri Rangbah ka jylla, u la jubab ïa ka jingkylli jong ki nongthohkhubor shaphang ka mat tih Uranium, ha kaba u la ong ba ka sorkar ka la pynkut noh shisyndon ïa katei ka mat, namar ba ha ri Khasi ka khyndew ka shyiap ka hap ha ka jingpeit jong ka District Council bad ki trai jaka bad ka sorkar India kam lah ban shu leh don bor lada ka District Council bad ki trai jaka kim shah.
Ki la ong ba ka mat ïa kajia pud ha Langpih sector ruh ka dei ka mat kaba ki jaka puta baroh ki don la ki jong ki jong ki trai. Ha ka Election jed MDC ruh baroh ki shnong ha Langpih sector la pynrung da u (L) bah Hopingstone Lyngdoh ha ka Electoral roll jong ka Khasi Hills Autonomous District Councils naduh u snem 1965, namar kata ka sorkar ka la dei ban pynkut noh ïa ka mat ïa kajia pud ha Langpih sector kumba pynkut ïa ka mat tih Uranium.
Na ka liang ki paitbah kiba na ki shnong Garo ki bym tip ei ei shaphang kata ka mat tih Uranium, ki la pynpaw ïa ka juh ka jingsngew halor ka jingpynsahteng ban pynbeit ïa u pud u sam, namar baroh ki paitbah nongshong shnong kiba dei ki Garo, kim kwah satia ban pynhap ïa ki jaka puta jong ki sha Assam hynrei ki kwah ban sah beit ha Meghalaya.
Ki la ong ruh ba U Myntri Rangbah u la dei ban pyrkhat bad shimkhia ban ïakren bad u Myntri Rangbah ka Assam ba ïa baroh ki shong Garo, dei ban ai beit sha Meghalaya.
Na ka liang ki riew rangbah Nepali ki la ong ba lada ka sorkar Assam bad ka sorkar Meghalaya ki pynkloi noh ban pynbeit ïa u pud u sam ka biang palat, namar lada ki hap ha Assam ruh ki sngew biang lada hap ha Meghalaya ruh kim sngew ei ei.
Haba ki shong ki sah ha ka thaiñ Langpih kim don kano kano ka jingbishni ne isih ïa ki Khasi, hynrei kin trei ïa ktah lang bad ha ka khaïi ka pateng ruh ki ïatyllun lang na wei shawei.
Kito ki Nepali kiba ri khuti muid bad khuti masi naduh hyndai hynthai ha kiba bun ki jaka ha West Khasi Hills kum ha ki thaiñ Nongstoiñ, Mawlangniang, Mawsiangbah, Langjasar bad kiwei, ki la ong ba wat la ki dei ki Nepali ruh hynrei kim tip shuh shaei ka don ka Nepal. Lada ki leit ruh kim don shuh wat tang ka jaka ban shong namar ba la pun la kha ïa ki ha West Khasi Hills bad ki kmie bad ki kpa tymmen ruh ki la ïap lut, kumta lada hap ha Meghalaya ruh ki sngew ba ka biang beit.