Mairang, Nailur 30: Ka District Swachh Bharat Mission Gramin, Eastern West Khasi Hills District ha ryngkat kajingïatreilang bad ka Mairang Town Committee, ha ka step sngi ba ar ka la pynlong ïa ka jingïakop mareh thong kaba tip kum ka, “Swacchotsav Marathon” kaba 5 kilometer.
Ïa kane ka marathon la pynlong kyrpang na ka bynta ki samla kynthei, shynrang bad ki khynnah hapoh ka District. Kane ka dei shi bynta ka Swachhata Hi Seva campaign, ka jingpynshai paidbah halor ka jinglehkhuid.
Ka thong ba hakhmat hi jong kane ka jingïakop Mareh thong ka long kum shi bynta ban pynphriang khubor shaphang ka jingkhuid jingsuba bad ka jingdonkam ban sumar ïa ka mei mariang.
La wan ban kaweh lama ïa kane ka jingïakob mareh da u Bah A. Nongbri, ADC jong ka Eastern West Khasi Hills District ha ka jingdonlang u Bah L. Myrthong, AEC, ki nongkitkam jong ka DRDA, ka tnad pulit Mairang bad kiwei kiwei.
Ïa ka jingïakop mareh la sdang na ka ophis treikam jong ka Deputy Commissioner bad la pynkut ruh ha kajuh ka jaka. La sakhi ruh ba da ki spah ngut ki khynnah, ki samla kynthei bad shynrang ki la wan ban ïashim bynta ha kane ka jingïakop mareh.
Haba ai jingkren, U Bah A.Nongbri u la ong ba ka jingpynlong ïa kane ka marathon ka dei shi bynta jong ka jingrakhe ïa ka swachhata hi seva, kaba ka jingmut jong ka ka long ka jingleh khuid ka dei ka jingshakri, namar ka jingleh khuid ka hap sdang na ngi iwei pa iwei bad ngi hap ban shim ïa ka rai ban ym bret pathar ne pynjakhlia ïa ka Mariang hynrei ban ïaleh katba lah ban pynkhuid.
Shuh shuh, ha kane ka sngi la sam ruh ïa ki khusnam bad ki syrnod ryngkat ka song pisa sha ki nongjop kum ka jingai mynsiem bad jingïaroh ïa ka jingwan ïashim bynta ha kane ka jingïakob.
