Shillong, Nailur 30 : Ka kynhun ïalehkai jong ka Nongrim Hills watla ka don sha trai jong ka miej khein point jong ka Shillong Premier League hynrei ha ka sngi Ba-ar ka la ïoh ban pynsyier that ïa ka kynhun ïalehkai jong ka Langsning watla hadien ka la mad pat ïa ka nam rem da ka said kata da 3-2 kol ha ka jingïakhun kaba itynnad bha kaba long ha madan ïalehkai jong ka SSA Stadium kaba ha First Ground, Polo. Shillong.
Ïa ki kol jong ka Langsning ha kane ka sngi la ïoh ban thep da u Richie Kharbani ha ka minit kaba 32 jong ka kylla step pynbud pat sa u Apborlang Kurbah ha ka minit kaba 34. Katba ia ka kol kaba lai bad kaba khatduh jong ka kynhun la ïoh ban thep da u Istarbor Marngar ha ka minit kaba 90+6, kata ha ki minit kiba khatduh jong ka jingiakhun.
Ïa ki kol jong ka Nongrim Hills ha kane ka sngi pat la ïoh ban thep da u Sanborlang Sohtun ha ka minit kaba 79 bad kawei pat lyngba ka kol kaba la bakla thep hi ha ka minit kaba 81.
Da ka jingjop ha kane ka sngi, ka Langsning ka la ïoh ban poi mynta ha ka kyrdan kaba lai jong miej khein point da ki 11 point katba ka Nongrim Hills pat haduh mynta ka dang ïakhun namar ka dang don tang 1 point na ki hynriew sien ïakhun.
Haba phai sha ka jingiakhun, baroh arliang mamla ki la ïoh ban pynsyier ha ka kylla step ha kaba ka Nongrim Hills ka la ïoh ban tur bunsien bha sha phyllaw kol jong ka Langsning hynrei da ka jinglah jong u rangap kol ka kynhun, kim shym la lah satia ban pynkhih.
Khlem da pynlehnohei ïa ki kabu ksiar, ka Langsning ka la ïoh ban thep haduh ar kol tang hapdeng ar minit ha kaba ïa ka kol kaba nyngkong la ïoh ban thep da u Richie da kaba u la ïoh ban pyndei da ka khlieh ha shwa ba u Apborlang un ïoh ban pynkhih ïa ka jar ha ka sien kaba ar na bynta ka kynhun.
Ynda la poi ka kylla miet ruh ka jingïakhun ka la nang itynnad shuh shuh khamtam haba ka Nongrim Hills ka la pyrshang tyngeh ban ïoh pynkhih jar. Da kane ka rukom ialekai khatduh ka kynhun ka la ïoh ban thep kol lyngba u Sanborlang Sohtun ha ka minit kaba 79 da kaba ïoh ban shu pyndei da ka khlieh ïa ka bol kaba wan lyngba ka freekick.
Katba ïa kol kaba ar jong ka kynhun ka la wan lyngba ka jingbakla thep hi da u rangïalehkai ka Langsning uba khlem poi pyrkhat ba ka bol kaba u pyrshang ban ïada ka poi pynban sha kol lajong.
Ka jingïoh ka Nongrim Hills ban thep ïa kine ki ar kol thret kam lah ban khlem da pynkyndit bynriew ïa ki rang ïalehkai ka Langsning, ha kaba ki la sdang ban nion tyngeh shakhmat ka rukom ïalehkai ka jong ki bad pyrshang ruh ban khyrwit katto katne tylli ki bol sha phyllaw jong ka Nongrim.
Dei ha ki minit ïalehkai ba la pynjlan ba ka kynhun lyngba u Istarbor Marngar u la ïoh ïa ka kabu kaba biang bha ban pynkhih ïa ka jar bad pynlong syndon ïa ka Langsning ba kan khur ïa ka jingjop ha kane ka janmiet.
Da kane ka namrem kaba hynne ka janmiet, ka Nongrim Hills ka sah satang lai tylli ki jingïakhun ba kan pyndep ha kane ka samoi ïalehkai ba mynta ka SPL. Ar tylli na kine kan dei pyrshah ïa ki artylli ki kynhun ba khlain kata ka Mawlai bad ïa ka Shillong Lajong FC.
Ki kynhun kiban ïakhun ha kane ka sngi Balang pat kin long hapdeng ka Lajong pyrshah ïa ka Mawlai ha ka por 4:30 baje janmiet.
