Shillong, Nailur 29: Ka Sorkar Meghalaya ka la thaw ïa ka anti-terror squad (ATS) kaba kyrpang ka ban khmih beit tang bad ki kam lehnoh ha ka jylla.
ÏA ka office ba shipor jong ka, la plie hapoh Police Headquarters da u Chief Minister Conrad K Sangma ha sngi Nyngkong ha ka jingïadonlang u Symbud Myntri Rangbah uba khmih ïa ka Home (Police) u Bah Prestone Tynsong.
Na ka liang u Sangma u la pynïaid ïa ka jingïalang kaba arsngi jong ki Superintendent of Police bad Commandant (SsP-COs) Conference ha kaba la ïakren ïa kiba bun ki mat kiba donkam ban pynkhlaiñ ïa ka tnat pulit ha ka jylla.
Haba kren sha ki lad pathai khubor hadien ka jingïalang, u Bah Tynsong u la ong ba ka ATS ka dei ka kynhun kaba aiti ba khlieh da Deputy Inspector General of Police (DIG) bad kin shim ka jingkitkhlieh ban khmih ïa ki kam pyntriem bad kam lehnoh, ba kynthup ïa ki jingshah pyntieng ba buh bom bad kiwei ki jingjia ba suba sniew ha ka jylla.
“Ka ATS ka dei ka cell kaba long la ka jong ka ban shimti bad jubab ïa ka jingma na ki kam pyntriem, ban pynthikna ki lad jingïada bad jingshong shngaiñ jong ka jylla. Kane ka kynhun ka long kyrpang ban peit ïa ki jingma na ki jingbuh bom bad ki jingsong kiba suba sniew, bad kin shim khia mardor halor kine ki jinglong jingman.”
Haba kylli la ka ATS ka ïa synriem kum ka National Security Guard (NSG), u Bah Tynsong u la pynshai ba ka ATS ka dei ka kynhun kaba aiti hapoh ka police headquarters, kam long kaba kongsan ban pynïaryngkat kyrdan bad ka NSG.
Halor ka jingdon ki nongtrei, u Bah Tynsong u la ong ba ka tnat pulit kan sa khmih halor ka jingdon ki pulit hynrei ka jingthung kam ka dang ïaid ban pynkhlaiñ ïa ka tnat bad ka ATS.
Haba bynrap ïa kane, u DIG Eastern Range Davies NR Marak u la ong ba ka ATS kan long kyrpang ba ïadei bad ki kam lehnoh kam pyntriem, kynthup ki kam khynra, ki jinglum ïa ki lad syntiat bad ki jingtohkit.
“Kane kadei kaba la pynlong kongsan da ka MHA ba donkam ban thaw ïa ka unit kaba pynleit jingmut ha baroh ki kam lehnoh, ki kam khynra, ki jinglum ïa ki lad syntiat bad ki jingtohkit,” da kaba bynrap ba ka ATS kan long ka kynhun kaba leit hiar thma sha ki khlaw bad kumjuh ruh ki jingkhynra ha ki jaka sor. La ong ruh ba kane ka unit kan pyntreikam ha ka jingleit ban khynra sha ki thaiñ Garo Hills bad kin ïoh rah ruh bad ki tiar kiba kyrpang bad ki jingshah hikai kiba kyrpang.
U Marak u la ong ba ka ATS ka donkam ïa ki pulit kiba kham pher kiba la tbit lyngba ki sap ha ki kam khynra ïa ki lehnoh.
U Superintendent of Police (SP) Pankaj Kumar Rasgania, ba khmih ïa ka Cyber Crime, u la batai shaphang ka jingïalang halor ki jingtreikam jong ka cybercrime branch.
Ka la don ruh ka jingbatai halor ka Anti-Narcotic Task Force (ANTF), ba la khmih da u Giri Prasad, bad ki jingpyrshang ban pynduh ïa ki kam drok na ka jylla.
“Ha ka jingshisha ngi la dep thung pura ïa Director bad ngi donkam shuh shuh ki nongtrei hapoh ka Directorate of Prosecution naba kane ka dei ka tnat kaba ngi donkam ban pynkyrpang ban ïoh ki briew khnang ba ngin lah ban pynsted ïa baroh ki mukotduma kiba dang sahteng bad suki suki kan sa poi sha ka kam ka ban pynkutnoh artat,” u la bynrap.
Ha ka jingïalang la ïohi ïa ka jingsam ïa ki jingtip lyngba ki presentation bad ki jingïasyllok halor ki topic kiba kongsan kynthup ïa ka cybercrime, new criminal laws, anti-infiltration, bad ki anti-narcotics.
U Myntri Rangbah bad u Symbud Myntri Rangbah bad ki heh ophisar ki la sam ïa ki jingtip halor kumno ban kyntiew ïa kane ka cell. Na ka liang u AIG Law and Order GW Lyngdoh MPS u la pynshai ha ka jingïalang halor ka jingpyntreikam ïa ki criminal law ba thymmai ba la mynjur da ka Parliament.
U MGT Sangma, ba khlieh ïa ka Anti-Infiltration Directorate, u la ïathuh ïa ki jingtip ba bniah sha u Myntri Rangbah bad kiwei ki heh ophisar.
