Kumba phi shakri ïa ka Jirang, shakri bha ruh ïa ka Ri Bhoi bad ka jylla : Kyntu ki Nongïalam

Nongpoh, Nailur 27: Kum ka jingsngewsarong ïa la u nongmihkhmat paidbah, ki Nongïalam ka NPP Jirang Block mynta ka sngi da ka jingsarong ki la pynkup burom ïa u Bah Sosthenes Sohtun uba dei u MLA bad MDC ka Jirang Constituency uba la shah jied kum u myntri sorkar ban peit ïa ka tnat Community and Rural Development ha ka jylla ba kum ki nongïalam ki kitbok kitrwiang ba un dang lah ban trei kham bha ym tang ïa ki paidbah ka Jirang Constituency bad ïa ka Ri Bhoi District bad ka jylla hi baroh kawei.
Ha kane ka sngi, ki nongai jingkren na ki nongïalam ka NPP Jirang Block bad na Ri Bhoi, ki la ai ka jingïaroh kaba khraw ïa u Bah Sosthenes Sohtun halor ka jingshakri kaba u la wan rah ka jingkylla ha Jirang Constituency bad dei lyngba ka jingtrei shitom bad ai ka jingkitkhlieh la sakhi ba ki don shibun ki jingkylla ha ka roi ka par hapoh ki shnong ki thaw ka Jirang Constituency naduh ba u la shah jied kum u nongmihkhmat paidbah.
Ki nongïalam ka NPP na Jirang bad na Ri Bhoi ym tang ba ki la ïaroh ïa ki kam kiba u la dep ban trei ha Jirang, hynrei ha kawei ka bynta ki la ai ruh ka jingkitbok kitrwiang ba un dang lah ban shakri kham bha hadien ba la shah tynrong ïa ka shuki nongïalam kum u myntrei sorkar na ka bynta ka Ri Bhoi bad ka jylla hi baroh kawei.
Ki nongïalam ka Jirang NPP Block bad na Ri Bhoi, ha kane ka sngi kum ka jingburom ïa une u nongïalam, ki la ai ruh da ki jingai sngewbha bapher bapher ïa u Bah Sosthenes Sohtun kum u myntri sorkar ba thymmai bad ryngkat ka jingkyrkhu kyrdoh ba un dang lah ban ai ka jingshakri kaba bha tam ïa ki paidbah ka Jirang, Ri Bhoi bad ha ka jylla hi baroh kawei.
Ïa kane ka jingpynkup burom la pynlong ha Dorbar Hall ka Shnong New Jirang ha kaba la don lang naduh ki nongïalam ka NPP Jirang Block bad na Ri Bhoi, ba kynthup ïa u Bah Balawan Syiemiong, General Secretary ka NPP Jirang Block, u Bah Lurshai Kharnaior, General Secretary ka NPP Ri Bhoi, ki nongkitkam ka NPYF, NPWF, ki nongïalam shnong lem bad ki riew rangbah ka thaiñ Ri Bhoi sepngi.
Haba kren ruh ha kane ka sngi, na ka liang u Bah Sosthenes Sohtun u la pynpaw shisha ïa ka mynsiem jong ka jingkmen bad ka jingsngewnguh halor kane ka jingai burom ïa u da ka party kum uta u Myntri sorkar ba thymmai bad ha kawei ka bynta u la kular ruh kumba u la shakri ïa ka Jirang Constiteuncy un dang ai shuh shuh ka jingshakri kaba bha tam ïa ka them Ri Bhoi bad ha ka jylla hi baroh kawei.