Nongstoiñ, Nailur 26: Ka 26 tarik u Nailur 2025 ka dei ka sngi lyngkhuh sngi ïap ba shiphew snem kynthih jong u radbah ka jaidbynriew, kata u (L) Ma Hoping Stone Lyngdoh.
Ha kane ka lyngkhuh snem, ka seng Hills State People’s Democratic Party ka la ïoh ban rakhe ha ka shnong Mawkyllei, kaba dei ka shnong trai u Maieit Hoping, kawei na ki shnong hapoh ka Ri Khaiñ Lyngdoh Nonglait ha Mawthadraishan, Eastern West Khasi Hills District.
Ha kane ka sngi kaba kyrpang, u Professor L.S Gassah Professor Political Science NEHU ba la shongthait, u la long u kongsan ha ka jingsynrang lang da u Dr. S.Kharsyiemlieh Judge District Council Court ba la shongthait kum u symbud kongsan.
Ha ka jingrakhe la ïadonlang naduh ki riew pawkhmat jong ka Kur Nonglait, ki riew pawkhmat ka seng HSPDP bad ki riew pawkhmat ka thaiñ kynthup ïa u bah K.P.Pangniang President ka seng HSPDP, bah Methodius Dkhar MLA ka Mawshynrut, bah Shakliar Warjri MLA ka Mawthadraishan, bah Srally Rashir MDC ka Mawshynrut, bah Kimfa Sidney Marbaniang MLA barim ka Rambrai Jyrngam, kong Fenela Lyngdoh Nonglait bad kiwei.
Kiwei pat kiba la ïadonlang ki dei ki nongïalam ba paw khmat bha jong ki sengbhalang bapher bapher jong ka thaiñ kynthup naduh ka seng KSU, HYC, FKJGP bad kiwei kiwei.
Haba ai jingkren, jan baroh hi ki riew pawkhmat ki la pynpaw ba ka jingkhlad noh jong utei u nongïalam ba radbah jong ka thaiñ, ïa kaba la ñiew ruh ïa u kum uwei na ki riew khraw jong ka jaidbynriew hapoh ka bri u Hynñiewtrep, ka la long shisha ka jingduh nong kaba khraw bad ki da sngew khunswet man ba ki kynmaw ïa utei u Riewkhraw, namar ba ki ngeit ba kin ym lah shuh ban ïoh ïa kum utei u nongïalam jong ka jaidbynriew.
Ka seng HSPDP ha kane ka sngi kynmaw burom bad rakhe kyrpang, ka la pynkup burom ruh ïa ki nongïaleh Hills State ka jylla da kaba ai ki jingai sngewbha ryngkat ki momentous kum ka dak ka jingsngewnguh ïa ka mynsiem len lade na ka bynta ka jylla.
Ha kane ka sngi nalor ka seng HSPDP, la rakhe ruh ïa katei ka lyngkhuh snem jong u (L) Hoping Stone Lyngdoh da ka kur Lyngdoh Nonglait, ha kaba ki la leit ban buh ïa u syntiew ha u dur Mot ba don ha phyllaw ka ïing Dorbar kur Lyngdoh Nonglait ha Mawkyllei.
Ym tang katta hynrei ka kur ka la ai ruh ïa ki jingai sngewbha sha ki samla jong ka kur kiba la wan shakhmat ha ki jingpule lyngba ki kyrdan bapher bapher kaba long kum ka jingpynkup burom ban ai mynsiem bad pynshlur.
