Mairang, Nailur 26: Ka National Rabies Control program hapoh ka ophis treikam jong ka District Medical and Health Officer West Khasi Hills District, ryngkat ka jingïatreilang bad ka ophis u District Animal Husbandry and Veterinary Officer West Khasi Hills Nongstoiñ, mynta ka sngi ka la rakhe ïa ka World Rabies day 2025 halor ka phang ‘Act Now You Me Community.
Kane ka jingïalang la pynlong ha iew langstieh Pyndengumiong Mairang, ha kaba la ïadonlang u Additional Deputy Commissioner ka Eastern West Khasi Hills District u bah M.Diengdoh kum u Kongsan, u Dr R.Marweiñ District Nodal Officer, u Dr M.L Kynta Sub Divisional A.H Veterinary Officer Eastern West Khasi Hills District, u Sordar shnong Pyndengumiong u bah Bornad Syiemiong, lem bad ki paidbah kiba wan iew ban hat ban sngap ïa ka jingpynshai na ki doktor bad na ki Ophisar ka district.
U Bah M.Diengdoh haba kren kum u Kongsan ha kane ka sngi, u la ong ba kum ki nongshong shnong ki donkam ban hap peit pyrman bha ïa ka jingdon jong ka jingshah dait ksew ba kim dei ban kheiñ sting.
U la pynpaw ba naduh u bnai Kyllalyngkot mynta u snem ki la don kumba 500 ngut tam kiba la shah dait ksew ha ka district bad lada kim shimkhia ban ai injek ha ka por ba biang kan wanrah ïa ka jingjia ba sngewsih.
U la kyntu ïa ki nongshong shnong ba kin shimkhia lada don kine ki dak ki shin, ba kin leit ha ki health centre bad dispensaries ban ïoh jingsumar. Kumjuh ruh ka long ban leit ai tika ïa ki ksew bad ïa ki miaw ka ban long ka jingïada ïa ki paidbah nongshong shnong.
