Yn ïaknieh nam lahduh ka SCSC Nonglatem bad ka Riatsaliya Mihmyntdu haka 3rd Division ka WJDSA

Jowai, Nailur 25: Ki kynhun ban ïaknieh ïa ka nam lahduh ha ka lympung phutbol kyrdan Third Division 2025 bala pynïaid daka West Jaiñtia District Sports Association (WJDSA) kan long hapdeng ka SCSC Nonglatem pyrshah ïa ka Riatsaliya Mihmyntdu.
Kane la pynthikna hadien ba ki la jop ïa la ki jong ki jingïakhun Semi final kaba la long ha ka 25 tarik u Nailur, 2025, ha madan Kiang Nangbah Stadium Dongmihsngi, Jowai.
Ka SCSC Nonglatem kala pynliem da 2-0 kol ïaka Lumkhangdong Kyndongtuber, ïa ki kol na ka SCSC Nonglatem la thep da u Obedient Pyrtuh (57’) bad u Tomy Lamare (66’).
Katba na ka liang jong ka Riatsaliya Mihmyntdu kala pynliem da 4-1 kol ïaka Pasyih Cultural SC, ïa ki kol na ka Riatsaliya Mihmyntdu la thep da u Become Pale (66’), u Neviki Phawa (72’) bad u Meban Kharsatti (73 & 77’). Ïa ka shikol na ka Pasyih Cultural la thep da u Budhokmiki Rymbai (29’).
Ka jingjop ka la pynthikna ba ka jingïakhun final mynta u snem kan long hapdeng ka SCSC Nonglatem pyrshah ïa ka Riatsaliya Mihmyntdu.