Shillong, Nailur 25: U Dr Yogal Kishore Mohanta, u Assistant Professor ka University of Science and Technology Meghalaya na ka tnat Applied Biology, u la shah kynthup napdeng ki top 2% scientists jong ka pyrthei ha une u snem 2025, kum ba la pynlait thup kyrteng da ka prestigious Stanford University kaba ha ri USA.
U Dr Yogal Kishore Mohanta u la poi ha ka kyrdan kaba 69191, ha kaba ka kam kaba kongsan jong u ka dei Enabling and Strategic Technical in nanobiotechnology, uba ha ki por kiba mynshwa ruh u la jop ïa kiba bun ki khusnam halor ki jingjop jong u ha kiba bun ki kam bad uba la kyntiew ruh ïa ka jingwad bniah ha ka microbiological research ha North East India.
Haba rakhe ïa kane ka jingjop jong u, ka University of Science and Technology Meghalaya (USTM) ka la phah ïa ka khubor, “Ïasoh bad ngi ban rakhe ïa kane ka jingjop! U Dr. Yugal Kishore Mohanta, u Assistant Professor uba shemphang jong ngi uba hikai ha ka tnat Applied Biology, USTM, u la wanrah ka burom kaba khraw ïa ngi. Haba ïoh ka jingithuh napdeng ki World’s Top 2% Scientist ha u 2025 da ka Stanford University, ki kam u Dr. Mohanta ki long ha ka Nano Biotechnology, kaba la pynlong ruh ïa u ban ïoh ïa kane ka burom. Kane ka jingjop jong u ka pynpaw ïa ka jingaiti jong ka jingwad bniah bad ka jingïaibteng ban pynleit jingmut ban wad ki jingtip.”
“Ka USTM ka ïohi ba kane ka jingïoh jingithuh jong u kadei ka sakhi ïa ki jingsngewtynnad jong u ha ki kam wadbniah bad ka jingjop jong u ka pynthaba ïa ki jingpaka ka kam wadbniah ha ka saïan ha USTM bad kaba ai ka jingshakri kaba ai mynsiem ïa ki scientist. Ngi kwah hir hir ïa kiwei pat ki jingïoh burom kiba lah ban wan na u Dr. Mohanta ha ki snem ban wan,” ka la ong.
U Dr. Yugal Kishore Mohanta, PhD, u dei u nongïalam ha ka nanobiotechnology, plant biology, bad nutraceuticals. Ka kam jong u ka don ka jingïadei bad ka United Nations’ Sustainable Development Goals (SDGs). Ka lab jong u, ka la lah ban ïoh shna dawai kynbat kaba la pyndonkam da u sohmarit iong ban sumar ïa ka sniehdoh (antimicrobial skincare) ba la pynsuk ha USTM ban kyntiew ïa ki shnong ki thaw lyngba ki jingshem thymmai.
Ka projek ba mynshwa u Dr. Mohanta ka MYCO-BIO, kaba la pyndonkam da ki tit ban shna ïa ki microcapsule ka ban pynkylla ïa ka jinglah ban treikam bha ka bam bad ba la ïoh ka khusnam kaba konsan halor ka international Research Networking Project (RNP-2024) grant, – ha ka jingïatreilang bad u Professor Renald Blundell ka University of Malta.
