Pynkup burom ka RIAS ïa ki samla ba la pyndep ïa ka jinghikai Computer

0

Nongpoh, Nailur 25: Ka Regional Institute of Advanced Studies (RIAS), kawei na ki shlem hikai computer ha ka them Ri-Bhoi mynta ka sngi ka la pynkup burom ïa kumba 100 ngut ki samla ryngkat ki syrnod kiba la pyndep ïa ki jinghikai computer ha ki course bapher bapher.
Ïa katei ka jingpynkup burom la pynlong ha Science Hall Nongpoh, ha kaba u Bah M Kharkrang, uwei na ki heh pulit ba la shongthaid u la shim bynta kum u kongsan ha ka jingdonlang u Pastor KB Kharbteng, Vice Principal ka Alpha English Higher Scondary School, Kong D. Nonglait, State Secretary ka BJP bad u Bah Skhem B Swett uba dei u Director jong ka RIAS ha ka jingïadon ryngkat lang ki samla pule kiba la dep pyntbit ha ki kam kor Computer lem bad ki kmie ki kpa.
U Bah Kharkhrang kum u kongsan haba kren ha kane ka sngi u la ai ka jingïaroh ïa ki samla pule kiba thrang ban tip bad nang kumno ban pyntbit ïalade ha kaba ïadei bad ka kor computer nalor ka pule ka puthi kaba ki ïaid ryngkat ha ki skul bad college khamtam ha kum kane ka juk stad kaba ka jingnang ïa ka computer ka long kaba kongsan bad kaba donkam.
U Bah Skhem B Swett, Director ka RIAS u la ong, ka jingpynlong ïa kum kine ki program kiba kyrpang na ka bynta ki samla kiba la pyndep shah hikai computer ka long ban nang ai mynsiem ïa ki khun samla ba kin sngewthuh ba ki jingnang jingtip ïa ka kor computer ka long kaba donkam ha ka jingim.
U la ong ruh ba kane ka juk ba mynta ka dei ka juk kyrduh kam kyrduh jam ba bun na ki samla ki shong khlem kam khlem jam, hynrei lyngba ka jingnag jingtip ïa ka kor computer ki don shibun ki kam bad ki lad kamai ba ki khun samla kiba thrang ban trei ki lah ban leh.

Leave A Reply

Your email address will not be published.