Shillong, Nailur 23 : Ka kynhun ïalehkai jong ka Laitkyrhong Sports Club ka la ïoh ban pynliem noh da 2-0 kol ïa ka Mawpat Sports Club ha ka jingïakhun Semi Final jong ka SSA 2nd Division Football league 2025 kaba long ha kane ka janmiet sngi Ba-ar ha ka jingïakhun kaba long ha madan SSA, Polo Shillong.
Ïa ki kol jop jong ka Laitkyrhong ha kane ka sngi la thep baroh ar tylli ha ka kylla step, kata lyngba u Samuel Suting ha ka minit kaba 24 bad na u Ibarlestar Pyngrope ha ka minit kaba 30.
Na ka Mawpat watla ki trei borbah ban pynphai hynrei tad haduh ban da kut ka por ïalehkai kim shym la lah satia bad kumta ka Laitkyrhong ka la jop suk ha katei ka sngi.
Lah ban kdew hangne ha ka jingïakhun ïa ka semi final kaba nyngkong ha ka sngi Nyngkong ka Mylliemlum ka la ïoh ban pynliem noh ïa ka Mawryngkneng ban pyntikna ïalade na ka bynta ka final kaba la buh ban long ha ka 27tarik mynta u bnai pyrshah ïa ka Laitkyrhong ha kane ka sngi Saitjain.
Ka jingïakhun ha ka SSA Shillong Premier League- 2025 mynta ka sngi Balang pat kan long hapdeng ka Maki SC pyrshah ïa ka Nongrim Hills SC ha ka por 3.30 baje janmiet.
