Shillong, Nailur 23 : Ka Meghalaya Deaf Association (MDA) ka sdang ïa ka jingrakhe ïa ka taiew jong kiba thut ka bor ïohsngew ne ka International week of the Deaf 2025 halor ka phang “No human right without sign language right” kaba la sdang naduh ka 20 haduh ka 27 tarik u Nailur 2025.
Ïa kane ka taiew kyrpang la plie paidbah ha ka 20 tarik Nailur 2025 ha Bethany Society, Laitumkhrah, Shillong. ha kaba ka Deputy Commissioner for Person with Disabilities, Meghalaya Kong Bridget Warshong ka la long ka Kongsan ha ryngkat ka jingdon lang u Rev. Saji Stephen, Director ka Don Bosco Teachnical School,Shillong kum u Symbu Kongsan.
Ïa kane ka jingrakhe la pynlong da ka Meghalaya Deaf Association ryngkat ka jingïatreilang bad ka Office of the Commissioner for person with Disabilities, Meghalaya, kaba la lum lang palat 100 ngut ki nongïashim bynta ha kylleng ka jylla Meghalaya kynthup ïa ki khynnah skul na ki skul bapher bapher.
Ha kane ka jingrakhe sngewbha kaban long baroh shi taiew kin don ki jingïalehkai bapher bapher kynthup ïa ka jingïakop kyntip, ka jingïakop ïalehkai carrom, ka jingïakop dro dur, bad kiwei kiwei ki jingïakop kiba dei kyrpang na ka bynta kiba don jingthut ka bor ïohsngew.
Ka don ruh ka jingïakop ïathuhkhana lyngba ka Indian Sign Language na ka bynta ki briew kiba don jingthut ka bor ïohsngew kaba thmu ban pynsngewthuh ïa ka sign language bad ruh ban pynpaw ïa ka kolshor bapher bapher jong ka imlang sahlang jong ki briew ba duna ka bor ïohsngew kaba pynthikna ïa ka jingïa ryngkat ha ka hok longbriew manbriew na ka bynta ki briew kiba thut ka bor jingïohsngew ha kylleng ka pyrthei.
“Ngi kwah ba ka imlang sahlang kan ïohi ïa ka jingkhlain jongngi, ka kolshor bad kaei ka jingnoh synniang kaba ngi wanrah sha ka pyrthei,” u la ong. Shuh shuh u ong ruh ba ki kwah ba baroh kin peit ïa ki da ka jingïa burom lang ym ban peit da ka jingsngewsynei.
Katba na ka liang ka Kongsan bad kumjuh nanu Symbud Kongsan ki la pynpaw ïa ka jingsngewkmen halor ka jinglah jong ka Meghalaya Deaf Association ban treibha ha kine ki khyndiat snem.
Ki la pynshlur ruh ïa kito kiba don jingthut ka bor ïohsngew bad khamtam ki samla pule ba kin snohkti lang ha ka imlang sahlang ban trei lang ban weng ïa ki diengpyngkiang bad ban long kum ka jingkieng kaban wallam ïa ka jinglong salonsar lang kawei.
Kane ka long katkum ka kyrwoh ba la phah da u Bah Johnkit Maring, General Secretary ka Synjuk.
