U Jitul Deka um dei ban tuklar ïa ka khyndew ka shyiap ha Meghalaya, thang tyngshop ki paidbah ha Killing

By Mawphor Editor On Sep 24, 2025

Nongpoh, Nailur, 23: Ki paidbah jong ki khatar tylli ki shnong ha ka thaiñ Killing kiba don hapoh ka shatri ka All Killing Dorbar Committee ha ka sngi Baar ki la mih ban pyrshah ïa ka jingujor sha ïingbishar Supreme Court da uwei na ki nongshnong ka jylla Assam uba la tip kyrteng kum u Jitul Deka pyrshah ïa ka skulbah University of Science and Technology, Meghalaya (USTM) bad kumjuh ruh ka jingpynjot ïa ki khlaw ki btap ha ka thaiñ Killing da kaba kynnoh ba ka la wanrah ïa ka jingshlei um ba khah khah ha sor Guwahati.
Ki paidbah ki la rah ruh ïa ki placard ban pynrem jur ïa u Jitul Deka bad thang ruh ïa ka tyngshop jong u ha madan ka shnong Jorbil, Killing.
Kane ka wan ruh hadien ka jingkynthoh ba na kapor sha ka por da u Myntri Rangbah ka jylla Assam u Himanta Biswa Sharma ïa ka skulbah USTM kaba la kynnoh ba dei ka jingtih khyndew na kaba la wanrah ïa ka jingshlei um da kaba kynnoh ba dei ka “Flood Jihad”, bad u Jitul Deka uba dei ruh u dkhot ka BJP na ka jylla Assam u la ujor da ka PIL sha Supreme Court.
Na ka liang jong ka ïingbishar Supreme Court ka la thung da ka ‘Central Empowered Committee’ ban wad bñiah halor ki jingkynnoh kumba la ujor da u Jitul Deka bad ruh wat ka sorkar Assam ka la kyrshan da kaba ujor Affidavit sha ka ïingbishar Supreme Court.
Ka Central Empowered Committee da ka jingbthah jong ka Supreme Court ka la pynlong ïa ka jingsorjamin ïa ki jaka ba la kynnoh ba ka don ka jingpynjot mariang ha ka thaiñ Killing bad kynthup ïa ka skulbah University of Science and Technology, Meghalaya bad ki jaka tih khyndew, ki jaka tih maw kiba don ha ka thaiñ Killing, Khanapara bad la kynnoh ruh ba ka jaka ba la tei ïa ka skulbah USTM ka dei ka ‘Recorded Forest’, bad ka dei kaba la shu tei beaiñ bad ai jingmut ruh ban daiñ kuna haduh 150 klur bad ruh ban pynkylla khlaw biang tang hapoh shisnem.
Ha kane ka sngi la donlang naduh u Myntri ka Sorkar Jylla u Bah Sosthenes Sohtun uba long u MLA ka Jirang Constituency, u MLA jong ka Mawhati u Bah Charles Marngar, u MLA ka Umroi u Bah Damanbait Lamare, ka MDC jong ka Nongpoh ka Kong Rona Khymdeit, u Paiem Ken Syiem Syiem ka Raid Marwet, u Bah Ngaitlang Dhar, ki nongmihkhmat na ka Hima Mylliem, ki nongïalam shnong, ki nongïalam sengbhalang lem bad ki paidbah nongshong shnong.
Haba kren ha ka jingïalang ki nongmihkhmat naduh ki MLA haduh ki MDC ki la pynrem jur ïa u Jitul Deka halor ka jingtuklar jong u wat ïa ki jaka puta jong ka jylla Meghalaya, bad ki la pynthikna ruh ba kum ki paidbah kim dei tieng namar ka Sorkar naduh u Myntri Rangbah ki don ryngkat bad ki paidbah bad ka sorkar kam shym la shong kli kti ban ïakhun ïa kane ka mukotduma bad ban ïakhun haduh da jop.
Kiba bun na ki nongkren ki la pynpaw ka jingbitar bad pynrem jur ïa u Jitul Deka u ba la nud ban tuklar wat ïa ki jaka puta ha ka jylla Meghalaya bad kum ki paidbah kim lah ban pdiang satia ïa katei ka jingleh jong u briew uba nabar ka jylla kaba la ktah wat ïa ki jaka puta jong ki nongshong shnong ha katei ka thaiñ bad dei halor katei ka nongrim ba kum ki paidbah ki bitar bad kim kwah shuh ba utei u rangbah wat tang ba un iuhkjat sha kane ka jylla.