Kynduh mawsiang ka Meghalaya na ka jingujor u Jitul Deka ïa ka USTM ha Supreme Court

Shillong, Nailur 20: Ka Sorkar Meghalaya ka la ïakynduh mawsiang namar ka jingujor jong uwei u nongshong shnong ka Assam uba la tip kum u Jitul Deka sha ka ïingbishar Supreme Court pyrshah ïa ka University of Science and Technology, Meghalaya (USTM) bad ïa ki jingtih maw, ka jingtih khyndew bad ka jingdon ki kor tylliat maw ha ka thaiñ Killin, Ri Bhoi District.
Ka jingshah ujor kam kan ktah tang ïa ka skulbah USTM bad ïa ki jingtih maw, tih khyndew ne ka jingdon ki kor tylliat maw ha ka thaiñ hynrei kan ktah ruh wat ïa ka Sorkar Meghalaya kaba lah ban duh ïa ki khajna, ka jingshah ktah ki jaka pule puthi, ka jingshha ktah ha ka liang ka ïohkam ka ïohjam bad ïa ki paidbah nonghshong shnong.
U Jitul Deka u la ujor sha ka ïingbishar Supreme Court halor ka jingkynnoh ba ka jingshlei um ha sorbah Guwhati ka dei kaba la ktah na ka jingtih maw, ka jingtih khyndew bad ka jingdon ki kor tylliat maw bad ruh ka jingpynjot mariang na ka thaiñ Killing bad Khanapara ha kaba ïa kane la kren pyrshah ruh wat da u Myntri Rangbah ka jylla Assam u Himata Biswa Sarma pyrshah ïa ka USTM da kaba kynnoh ba ka jingshlei um ha Guwahati ka dei ka Flood Jihad.
Ha ka jingujor u Jitul Deka, la kynnoh ba ka jingtih khyndew, ka jingtih maw na ki bynta rilum ka jylla Meghalaya ka la ktah ym tang kata ka jingshlei um sha sor Guwahati bad bun ki wahduid, ki wah heh kiba don ha ka jylla Assam ki la shah ktah lang na kine ki kam pynjot mariang na Meghalaya ba ka ïingbishar Supreme Court ka la thung kyrpang da ka komiti kaba la tip kum ka ‘Central Empowered Committee’ ban tih bniah halor ki jingkynnoh kumba la ujor da ka Jitul Deka bad ruh wat ka Sorkar Assam ka la kyrshan da kaba ujor Affidavit sha ka Supreme Court.
Halor kitei ki nongrim ba la ujor da u Jitul Deka bad ha ka jingai jubab da ka Sorkar Assam lyngba ka Affidavit, ka Central Empowered Committee ka la pynlong ïa ka jingsorjamin ïa ki jingpynjot mariang ha ka thaiñ Killing bad kynthup ïa ka skulbah University of Science and Technology, Meghalaya bad ki jaka tih khyndew, ki jaka tih maw bad ki kor tylliat maw kiba don ha katei ka thaiñ Killing, Khanapara.
Ka Committee kan ai ïa ka jingmynjur katkum ka jingshem na ka jingsorjamin ïa ka jinglong jingman halor ka jingpynjot mariang bad yn sa phah pat ïa ka kaiphod sha ka Supreme Court ban shim ïa ka rai kaba khatduh.
Kumba la paw na ka jingsorjamin, ka USTM kawei na ka skulbah ha Meghalaya ka ban sa shah ktah bha halor ka jingkynnoh ba la pynkhein ïa ka Forest Act 1980, ha kaba la shna ïa ka skulbah bad kiwei kiwei ki jingtei khlem da ïoh jingmynjur na ka Sorkar Pdeng katkum ka section 2 jong ka Forest Act, 1980 bad la kynnoh ruh ba katei ka jaka ba la tei ïa ka skulbah USTM ka dei ka ‘Recorded Forest’, kaba dei katkum ka jingwad bniah ka Committee.
Kumba la pynpaw ha ka jingai jingmut da ka Central Empowered Committee, ka skulbah USTM ka hap ban siew ïa ka kuna kaba kot T. 150 klur halor ka jingpynkhein ïa ki kyndon bad ki kam pynjot mariang ha kaba tei ïa ka skulbah ha ka Recorder Forest.
Na kane ka jingsorjamin jong ka Central Power Committee, kiba shah ktah ym dei tang ka skulbah USTM bad kin don ruh kiwei kiwei khatam ki jaka tih maw, jaka thih khyndew bad ka jingdon ki kor tylliat maw ha katei ka thaiñ Killing bad Khanapara ban sa pynkylla khlaw biang tang hapoh ka shi snem.
Haba shim kyllum na ka jingai jingmut jong ka CEC kiba shah ktah ki kynthup ruh naduh Byrnihat sha Khanapara, ka thaiñ Killing bad terter bad kane ka lah ban ktah ha ka jylla hi baroh kawei ha kaba baroh kin sa shah ktah lut lada ïaid katkum ka jingai jingmut ka CEC hadien ba la sorjamin.
Haba phai pat sha ka Sorkar Meghalaya, halor kane ka jingujor u Jitul Deka bad halor ka jingai jubab ka sorkar Assam sha ka Supreme Court ka sorkar Meghalaya lyngba u Myntri Rangbah ka jylla u Conrad K. Sangma ka la kyntait war ïa ka jingkynnoh ka Sorkar Assam bad ruh halor ka jingujor jong u Jitul Deka ba ka jingshlei um sha sor Guwhati ka dei kaba ktah na ka jingtih khyndew, tih lum, ne tih maw na ki lum ka Meghalaya.
U Conrad Sangma, dang shen u la pynshai sha ki lad pathai khubor halor ki jingkynnoh ym tangba u la ïada ïa ka skulbah USTM ba ka la tei ïa ka skulbah katkum ki kyndon aiñ, hynrei u la kyntait ruh baroh kitei ki jingkynnoh ka Assam kim dei kiba shisha bad ka jingshlei um kam dei kaba ktah na Meghalaya bad ka dei hi ka jingbym lah ka sorkar Assam ban pynbiang ïa ki nala um ne ka jingpynheh ïa ki jingtei ha ka sor Guwahati.
Ka Sorkar Meghalaya ka la phah ruh ïa ka jubab sha ka Supreme Court halor ka jingshah ujor bad ïa kane ka kam yn sa shong bishar biang ha ka 8 tarik, Risaw 2025.