Ryngkat ka jingduhnong ba khraw, phah khubor sngewlem ka RBYF halor ka jingkhlad u Dr. D.D Lapang

Nongpoh, Nailur 13: Kawei na ka seng bhlang na Ri Bhoi District kaba u Dr. D.D Lapang u la don bynta ban seng na ka bynta ban shakri kyrpang ïa ki paidbah ka dong Ri Bhoi, ka Ri Bhoi Youth Federation (RBYF) mynta ka sngi ka la pynpaw ïa ka jingsngewduh nong kaba khraw halor ka jingklad noh u Dr. D.D Lapang kum u MLA barim ka Nongpoh bad ruh uba la bat ïa ka kyrdan Myntri rangbah haduh saw sien kynthih ban shakri ïa ka jylla bad khamtam na ka bynta ka Nongpoh bd ka Ri Bhoi District.
Haba kren sha ki lad pathai khubor, u Working President ka RBYF u Bah Liander Nongshli, u la ong ba ka RBYF ka dap shisha da ka mynsiem jong ka jingduhnong kaba khraw halor ka jingkhlad noh u Dr. D.D Lapang kum u Nongïalam ba radbah ka jylla bad khamtam na ka bynta ka Ri Bhoi District.
U la ong ruh u Dr. D.D Lapang um dei satia tang u MLA ne u Myntri rangbah ha ka jylla, hynrei dei ha ka jingïalam lynti bad ka jingaibuit jong u, ba la seng ïa ka RBYF ha u snem 1979 ba ka seng RBYF ka la ïaid lynti haduh 46 tylli ki snem ban ai ka jingshakri na ka bynta ki paidbah ka dong Ri Bhoi.
“Ka seng RBYF ka sngewduh nong shisha ba khlad noh u Dr. D.D Lapang uba la don shisha ïa kata ka kyrdan nongïalam ym tang ha Ri Bhoi bad ha ka jylla hi baroh kawei” ong u Bah Nongshli, bad bynrap ba ka seng RBYF ka ai ka burom bad kan dang ïai burom halor ka jinglong nongïalam u Dr. D.D Lapang uba la leh shisha shibun ki kam kiba bha ha ka jylla bad ka seng ka sngewmen eh ruh ka dei hadien ba u Dr. D.D Lapang u la wan hi ban plie ïa ka ophis treikam ka seng shwa ba un khlad noh na sla jong kane ka pyrthie ba kum ka seng ka sngewhun mynsiem ba la plie ïa ka ophis da ki ksang kti jong u Dr. D.D Lapang ba ka seng RBYF kan dang lah ban bteng ka jingshakri na ka bynta ka bha ka miat bad ka roi ka par ki paidbah ha Ri Bhoi District” u la bynrap.
U la ong ruh ba ka seng kam lah ban ñiew tang ïa ki matti u Dr. D.D Lapang uba la wan rah shibun ki jingkylla ha Ri Bhoi District bd kum ka seng ka buh tang ki jingduwai ba u Blei un ai ïa kata ka mynsiem jong ka jingjah thaid ha ka khet bneng jong u.
Shuh shuh, u la bynrap ruh ba ka seng RBYF ka phah ruh ïa ka khubor sngewlem sha ka ïing ka sem, ki khun ki kti, ka kurim bad ka kur Lapang ba u Blei ka jingieit un pyntngen halor ka jingduh noh ïa une u nongïalam bad ka seng ka khmih lynti ruh ba u Dr D.D Lapang un dang ïai kyrkhu ba ngin dang lah shuh shuh ban leh shibun ki kam kiba khraw ban bud nuksa ïa ki dienjat jong u Dr. D.D Lapang, u la bynrap.