BRAZIL, Nailur 13: U coach ka Brazil, u Carlo Ancelotti, u la ong ba ka jinglong jingman jong ka met jong u Neymar, kan long kaba kongsan bha ban kynthup ïa u ha ka kynhun ïalehkai jong ka ri, na ka bynta ka World Cup jong u snem ban wan, hadien ba une u rangïalehkai ba 33 snem ka rta, ula jah kyrteng na ki jingïalehkai qualifier ba dang shen.
U Ancelotti u la weng ïa u Neymar na ka kynhun ïalehkai jong u kaba don 23 ngut ban ïakhun ïa ka World Cup qualifier pyrshah ïa ka Chile bad ka Bolivia, namar ba u Neymar u la don ka jingmynsaw kaba malu mala ha ki bynta jong ka kjat. Hynrei hadien kata u Neymar u la ong ba ka jingshah weng jong u ka dei namar ki daw ba stad.
Une u khlur ïalehkai barim ka Barcelona bad Paris Saint-Germain um shym la phong satia ïa ka jersey rong stem naduh u Risaw 2023, ha kaba u la mad ïa ka jingmynsaw kaba jur ha ka khohsiew kaba la pynjynjar ïa ki jingpyrshang wanphai biang jong u.
“Ngim nym peit bñiah kumno u Neymar u ïalehkai, ka paw shai. Baroh ki tip ïa ka sap jong u,” la ong u Ancelotti ha ka sngi Thohdieng.
“Ha ka phutbol kaba mynta, ban shim kabu ïa ka sap jong u, u nongïalehkai u hap ban don ha ka met kaba koit ba khiah. Lada u don ha ka met kaba shait kaba khlaiñ, un ym don jingeh ban don ha ka kynhun ïalehkai ka ri.
“Baroh ki kwah ïa u Neymar ha ka kynhun ïalehkai ka ri ha ka met kaba koit ba khiah. Nga la ïakren bad u bad nga ong, ‘Phi ka por ban pynkhreh ha ka rukom kaba bha tam ban don hangta bad ïarap ïa ka kynhun ban pyrshang ban leh ïa kaba bha tam ha ka World Cup’.”
U Neymar u la pyni ïa ki jingtbit jong u naduh ba u la wanphai biang sha ka klob ba naduh dang khynnah jong u, ka Santos, na ka kynhun ïalehkai jong ka Saudi Arabia ka Al-Hilal.
Hynrei ki jingeh jong u ki la paw pyrthei ha u bnai ba la dep haba u la mih noh na madan da ki ummat hadien ba ka Santos ka la shah rem da 6-0 ha ka Vasco da Gama.
U Ancelotti u la ong ba u ïohi ba u Neymar u ïalehkai pdeng, la ka long kum u attacking midfielder lane u striker.
“Nga la ïakren bad u … Baroh ki long kiba shai, ka jingmut ka sah kumjuh,” la ong u Ancelotti.
“Um lah ban ïalehkai shabar namar ka phutbol jong kane ka juk ka donkam ïa ki nongïalehkai tur khmat kiba don ïa ka jinglong met kaba khlaiñ; Ka long kaba donkam bha. U lah ban ïalehkai kum u attacking midfielder khlem jingeh.”
Ka Brazil, kaba la dep ban rung sha ka World Cup ha Canada, Mexico, bad America, kan sa don ka jingïalehkai pyrshah ïa ka South Korea, ha ka jingïalehkai paralok ha Seoul, ha ka 10 tarik Risaw.
