Da ki marbam ïarap u samla bad ka kompeni NEZONE ïa ki nongpang TB ha Ri-Bhoi

Nongpoh, Nailur, 09: Ka ophis jong ka District Tuberculosis Officer (DTO) Ri-Bhoi District mynta ka sngi ka la pynlong ïa ka jingrakhe ïa ka sngi sah kynmaw kaba 3 jong ka Pradhan Mantri TB Mukt-Bharat Abhiyan ha ka Conference Hall jong ka Nongpoh Civil Hospital. Ha katei ka sngi la sam ruh ïa ki marbam sha 13 ngut ki nongpang TB na Ri-Bhoi lyngba ka jingnoh synñiang jong u samla Pyndaplang Wahlang, bad ruh na ki kompani NEZONE Pipes and Structures bad NTL Steels, Byrnihat kiba la shim bynta kum ki Ni-kshay Mitra.
Ha katei ka jingïalang, ka Dr A.R. Marak, DMHO Ri-Bhoi District ka la long ka kongsan, haka jingdonlang ka Dr E. Kalwing, District TB Officer, u samla Pyndaplang Wahlang bad ki nongmihkhmat na ki kompani ryngkat ki 13 ngut ki nongpang TB ki la ïadonlang.
Katkum ka jingtip ba la ai da ka Dr E. Kalwing, haduh mynta ka Ri-Bhoi District ka don haduh 314 ngut ki nongpang TB, hynrei tang 217 ngut ki la ïoh jingïarap da ki riew shimet bad ki kynhun bapher bapher bad kiba tam ki dang donkam ka jingsnohkti lang bad ka jingïarap jong kiba bun ban rat diengkhong ïa katei ka jait jingpang.
U samla Pyndaplang Wahlang haba kren ha katei ka sngi, u la pynpaw ka jingsngewnguh ïa ka sorkar kaba la buh thong ban pynduh jait ïa ka jingpang TB. U la ong ruh ba ki nongpang TB bun ki dei kiba wan na ki longïing ba duk, kiba shem jingeh ban ïoh bam kaba biang. Kumta ka jingïarap kum kane ka long kaba kongsan ha ka jingkoit jingkhiah jong ki. U la khot ruh ïa ki riewshimet bad ki kynhun bapher bapher ban shim bynta da ka mynsiem ba kylluid ban ïarap ïa ki nongpang TB khnang ba yn lah ban rat diengkhong ïa ka jingpang ha ka jylla bad ka ri hi baroh kawei.
Na ka liang ka Dr AR Marak DMHO ka la ong ba kitei ki briew kiba ïoh ïa katei ka jingpang ki don hapdeng ka jingïakhun bad hap ban bud ryntih ïa ki jingbthah ki doctor bad kumjuh ruh ban dih thikna ïa ki dawai kiba khlaiñbor kumta ki donkam ban ïoh ïa ka met ka phat kaba khlaiñ ban dih ïa kitei ki dawai bad ruh ka bam ka dih ka dei ban long kaba biang kumta donkam ka jingsnohkti lang jong kiba bun ki riew sbun mynsiem ban ïarap ïa ki khnang ba kum ka tnad ka koit ka khiah kan lah ban ïakhun ïa katei ka jingpang bad kumba la buh thong wat ban pynduhjait syndon ïa ka.