Shillong, Nailur 08: Ka sienjam kaba nyngkong ban pynlong ïa ka Meghalaya Women’s State League kan sdang ha ka 20 tarik Nailur da kaba plie pyrda ïa kane ka lympung ha SSA Stadium, Polo, Shillong.
Kane ka lympung kaba nyngkong eh na ka bynta ki kynthei ha ka jylla baroh kawei, kan pynïasoh lang ïa ki kynhun ba khlaiñbor bad kiba kynsai tam jong ki District Associations kiba la pynïasoh bad ka MFA. Lah ban ong ba kane ka la long ka thong jong ka MFA ban pynlong ïa ka Women League bad ka jingangnud kan sa urlong tang hapoh ar taïew da ka jingkyrshan jong ka sorkar Meghalaya.
Ka MWSL kan plielad ruh ïa ki klob ka Meghalaya ban ïashim bynta ha ka sien kaba nyngkong ha ka Indian Women’s League second division (IWL 2).
Ka jingwanrah ïa ka MWSL ka long halor ka jingseisoh ïa ka jingpynlong ïa ka Meghalaya State League, kaba dei ka lympung na ka bynta ki kynhun shynrang, kaba la kyrshan ruh da ka sorkar jylla. Kito ki synjuk district kiba ladep ïasoh bad ka MFA bad kiba pynlong ïa ki lympung ïalehkai women league ha ka thaiñ ki la lah ban wanrah hakhmat ïa ka kynhun lahduh bad kaba wan ba-ar (runners-up) ban ïashim bynta ha ka MWSL.
Kin don haduh 13 tylli ki kynhun ban ïashim bynta ha kane ka lympung ïalehkai na ki 8 tylli ki synjuk District kiba la ïasoh bad ka MFA, bad la phiah ïa ki ha ki lai tylli ki zone – ba kynthup ïa ka Khliehriat, Shillong bad Tyrsad.
Kine ki kynhun ki long ka: Na Rympei Football Academy bad ka Attacker Youth Club Pahamsyiem na Ri-Bhoi District Sports Association, ka Laitkor SC bad ka Pay For Right Football Academy kiba na ka Shillong Sports Association, ka Jakrem SC bad ka Mawten SC jong ka Mawkyrwat District Sports Association, ka Young Sports Social & Cultural Club bad ka Bright Future SSCC jong ka Pyndengumiong District Sports Association, ka Diengshynrum SC kaba na East Jaintia Hills District Football Association, ka Mawlum Tyrsad SC bad ka Mawsawrit SC jong ka Tyrsad Area Sports Association, ka Lapalang SSCC na Riwar Mihngi Football Association bad ka Chirupheiwei Nongkynrih FC jong ka Laskein Block Sports Association.
Ia ki jingtip ba kham bñiah yn sa pynbna da ka MFA ha ka por kaba biang.
