Shillong, Nailur 07: U Chief Justice jong ka Meghalaya High Court u Indra Prasanna Mukerji u la shongthait noh ha ka 5 tarik u Nailur, hadien ba u la kynjoh ïa ka rta ba la ïoh ban shongthait.
Ha kane ka sngi la pynlong ïa ka ‘Farewell Full Court Reference’ ha Meghalaya High Court ban rakhe ïa kane ka sngi, kaba la ïadon lang u Advocate General, Additional Advocate General, ki nongïasaid aiñ, ki heh sorkar, bad kiwei kiwei.
Ki nongkren bapher bapher kiba la wan sha kane ka jingïalang ki la pynkynmaw ïa ki jingnoh synñiang jong u Justice IP Mukerj ha ka jnglong Nongbishar ha ka jylla.
KI la ong, “Ha ka por kum u Nongbishar Rangbah ka Meghalaya High Court, ula pynïaid bad pynmih ïa ki hukum ha ki katto katne ki mukotduma kiba pawnam kum ka mukotduma jong ki nongdie jingdie ha surok, ka jaka thang briew na ka bynta ki jaitbynriew Hindu Khasi & Jaiñtia, ka jingktah ki ksew ïaid wir, ka jingpynjot ïa ka mariang haba pyntrei ïa ka surok Shillong-Dawki, ka Central Bonded Warehouse bad kiwei kiwei.
Une u nongbishar ula shim ruh ïa ka bynta kaba khraw ha kaba pynroi ïa ki jingtei jong ka ïingbishar ha ka jylla,” ong u Registrar General jong ka High Court ha ka kyrwoh ba la pynmih ha ka sngi U Blei.
La ong ba da ka jingshongthait noh u Justice Mukerji, ka Ministry of Law and Justice, Department of Justice (Appointments Division), ka sorkar India, ka la thung ïa u Justice Hamarsan Singh Thangkhiew, uba dei u nongbishar jong ka Meghalaya High Court, ban pyndep ïa ki kam jong ka ophis jong u Chief Justice High Court jong ka Meghalaya naduh ka 6 tarik Nailur.
