Ka sorkar jylla, ka la shim ïa ka rai kaba tyngeh, ha ka sngi nyngkong, da kaba kan siew hi noh ïa ka tulop jong ki nongtrei ha ki lai tylli ki District Council bad haba shu sngap, ka don ka jingsngew kyndit ba kumno kat ïa ka Autonomous District Council, yn leit rung da ka sorkar jylla, haduh ha pliang ja syndon pluk.
La ïohi ba ka Garo District Council, kam lah ban siew ïa ka tulop kaba 43 bnai tam sha ki nongtrei jongka bad nangta sa ka Jaiñtia hills District Council, ba kam lah shuh ban siew ïa ka tulop kaba haduh 7 ne 8 bnai kynthih bad katei ka jingeh, kaba ki nongtrei ki ïakynduh, ka la pynlong ïa ka sorkar jylla, ba kan ïuhkjat noh halor katei ka mat, da kaba ka shim rai ba kan siew hi noh ïa ka tulop jong ki nongtrei ha baroh lai tylli ki District Council.
Halor kane ka mat, ngi dei ban kynmaw, ba kham mynshwa ha ki snem 1983, ka sorkar jylla, ha ka por jong U Capt WA Sangma, ka la dep knieh noh ïa ka jingpynïaid ïa ki skul Primary na ki District Council, namar ba kim lah ban siew tulop ïa ki nonghikai bad hadien kata, la ïohi, ba ka bor jong ki District Council, ka sa sdang ban nang shah khylliap kawei hadien kawei pat, namar ba ka sorkar jylla, ka la nang ñion jubor ïa ki District Council, lyngba ka jingdon jong kata kaba ki ong ka paragraph 12 A.
Ha kaba ïadei pat bad ka rai jong ka sorkar jylla, ban siew noh ïa ka tulop jong ki nongtrei, katei ka rai ka sngew khor palat, namar ba ka sorkar jylla, kam don jingïadei eiei ruh em bad ki District Council; hynrei kumba ka long mynta, ka pyni shai ba ki MDC, kiba don ha ki lai tylli ki District Council, ki trei kam khlem aiñ khlem kanun, ha kaba kim lah ban pyrkhing ïa ki jaka ki puta, ha kaba ki Syiem, ki Sirdar, ki Dolloi, ki ïaid katba ki mon, nangta ki ïa thung nongtrei katba ki sngew bit ma ki bad ka dei kane keiñ, kaba la buh jingeh, ba kin siew tulop ruh.
Ka nuksa kaba shai, ka long ba lada ka Jaiñtia District Council, ka don nongtrei haduh 1100 ngut tam, kham bun ban ïa ka Khasi District Council, kaba don kumba 800 ngut antad, nangta sa ka Garo District Council, kaba don 1,300 ngut bad katei ka pyni, ba ka jingïathung kam, ka la dei ban shu bam duh ïa baroh ki jingdon jingem jong ka Council bad ynda la lut ploiñ ban sa shu khang dam noh syndon.
Ka jingleh ka sorkar jylla, ka don bun jingmut bad kaba pynlyngngoh ka long ruh ba imat ïa katei ka rai la shim hi da u Myntri Rangbah ka jylla, khlem da ïa syllok bad u Myntri uba peit ïa ka tnat District Council Affairs (DCA) bad ka jingmut haba paw ka lah ban long shisha ka ban ïarap ïa ki nongtrei jong ki lai tylli ki District Council, hynrei ngi hap pat ban shai, ba katei ka jingthmu, ka long ban sa knieh noh ïa ka pla tyngka jong ki lai tylli ki District Council bad kumta kin sa shu long tang ki khlieh synshar, ba khlem iktiar eiei ruh em, hynrei ki ban shah samkhmut ha ka sorkar jylla.
Ha kaba ïadei bad kane bun na ki paidbah ki la pynpaw lypa ïa ka jingeh lada ka sorkar ka shim ïa kane ka bynta naba ki ADC ki dei ki jaka treikam kiba laitluid bad ki bym lah satia ban shah tuklar.