Shillong, Nailur 04: Ka jaka ïeng jeep kaba don ha Nongbah Shillong ka la long kawei na ki jaka kiba la I jakhlia bha ha kaba ïa kane la shem ha kine ki sngi ba ki nala ki la shu dap da ki um jaboh bad kiba ktieh haduh ba la ishyrkhei.
Kawei na ki la nala kadei kaba don ha ka lynti ban kiew sha Ïewduh ha kaba kane ka la ktah bha ïa ki briew kiba wan na ki thaiñ nongkyndong bad kumjuh ruh kiba wan na ki thaiñ Ri Bhoi kiba ju wan thied wan pet ha kaba ki la ud ki la nam manla ka por ha kaba ïadei bad ka jingjaboh kane ka jaka.
Kane ka nala ym tang ba ka dap da ka jaboh hynrei wat ka slab kaba don ha kane ka jaka ka la pra bad julor lut bad kane ka la wanrah ka jingsma ïa kane ka jaka baroh kawei, kumta donkam ïa ki bor ba dei peit ba kin shim khia ha kaba ïadei bad kane ka jingeh ba la mad da ki paidbah.
