Senior Women’s National Football Championship:Mih ka kynhun ki thei-ïalehkai ka jylla ban leit ïakhun sha West Bengal

Shillong, Nailur 03: Ka kynhun ki thei-ïalehkai phutbol jong ka Meghalaya ka la mih na Shillong hynne ka sngi ban leit sha West Bengal na ka bynta ban ïakhun ha ka lympung jong ka ‘Senior Women’s National Football Championship 2025-26’.
Ha kane ka lympung ka Meghalaya ka la shah pyn-ngat ha ka Group D ryngkat bad ka Railways, Sikkim bad ka West Bengal, ka jylla kaba pdiang ban pynlong ïa ki jingïalehkai.
Kane ka kynhun ïalehkai jong ka jylla kaba don 20 ngut, kaba la jied da ka Meghalaya Football Association, ka kynthup lang ïa ki nongïalehkai kiba la shemphang bad ki durkhmat kiba kham thymmai.
Ka kyrteng kaba khring ïa ki khmat ka dei ka nongap kol ka Ribansi Jamu, kaba dang shen ka la don bynta ha ka kynhun ïalehkai jong ka India kaba la rung sha ka AFC U-20 Women’s Asian Cup, watla kam shym la ïoh por ban ïalehkai.
Ka jingkynthup lang ïa ki kyrteng kiba paw bad kiba la shemphang kum ka Makrisha Songthiang, ka Nisilia Majaw bad ki khynnah samla kum ka Eiladki Ksoo bad ka Inrilaidor Khongthaw ka jylla ka la ïoh ïa ka kynhun kaba pura.
Ka Meghalaya kan sdang ïa ka jingïakhun kaba nyngkong pyrshah ïa ka West Bengal ha ka 06 tarik Nailur, bud sa ka jingïakhun pyrshah ïa ka Sikkim ha ka 08 tarik Nailur bad pyrshah ïa ka Railways 10 tarik Nailur.
Ka thup kyrteng ki thei ïalehkai ka Jylla ki long: Ribansi Jamu, Banrisha Wahlang, Darishisha Kharlyngdoh, Saralin Warlarpih, Judith Kharmuti, Baiahunshisha L Nongbri, Ibadarihun Nongsiej, Badarishisha Kharumnuid, Bahunlang Synrem, Ibakordor Wahlang, Makrisha Songthiang, Cathrine Kharkongor, Marbarin Nongrum, Nisilia Majaw, Inrilaidor Khongthaw, Iaphisha Marbaniang, Eiladki Ksoo, Ribahunshisha Kharshiing, Iaraplang Nongrum, Ibashembha Khongsit
Support staff: Kitboklang Kharkongor (head coach), Haphilabet Kharkongor (assistant coach), Ibashisha Khongwet (manager) Monaliza Don (physio)