Lyngba ka hat trik jong u Alem Khongwir khur ka Mylliem ïa ka jingjop kaba nyngkong ha ka SPL 2025

Shillong, Nailur 03: Ka hat-trick ha ka kylla miet ba la thep da u Alem Khongwir ka la pynïoh ïa ka Mylliem ïa ka jingjop kaba nyngkong ha ka lympung ïalehkai jong ka Shillong Premier League 2025. Kane ka jingjop ka la wan hadien ba ka la pynliem noh ïa ka Malki da 3-0 kol ha ka jingïalehkai kaba 15 jong kane ka samoi ha madan first Ground-SSA Stadium, Polo, ha ka janmiet jong ka sngi Balang.
Hadien ka kylla step kaba khlem thep kol, u Alem u la pynkhihjar ha ka minit kaba 55, 64 bad 70 minit. U la thep ïa ka kol kaba nyngkong da ka kjat kadiang, kaba ar da ka khlieh bad kaba lai da ka kjat kamon, kaba la pynlong ïa kane ka hat-trick kaba paka. Ka dei ruh ka hat trick kaba nyngkong eh ba uno uno u rangïalehkai u la lah ban thep ha kane ka samoi.
Baroh ar tylli ki kynhun ki la kiew kyrdan na ka First Division 2024, ha kaba ka Malki ka la rah nam lahduh bad ka Mylliem ka la wan ba ar (runners-up). Ha ka jingïakynduh pyrshah jong ki ha ka samoi ba la dep, ka Malki ka la jop da 2-1 kol hynrei ka Mylliem ka la ïaid shibun ki jingpynkylla ha ka kynhun katba ka pynkhreh na ka bynta ka samoi ba nyngkong jong ka SPL.
Lah ban kdew ba ha ka kylla step, ym shym la don kano kano ka liang kaba lah ban pynkhihwin ïa ka jingïalehkai, watla u Bankit Nongkhlaw jong ka Malki u la lah ban khanglad ïa ka jingpyrshang kaba paka jong ka liang pyrshah bad nangta u la mareh stet shakhmat sha ka liang kadiang shuwa ban pashat ïa ka bol hapoh phyllaw kol, watla ym don uwei ruh na ki paralok jong u uba la lah ban poi sha ka bol ha ka por kaba biang. Kumjuh ruh ka free-kick ha ka minit kaba 10, kham pajih ïa ka kol, la shu pynlehnohei noh da ka Malki, ha kaba u Fashioning Syngkli u la shut ïa ka bol shakiar jong ka kol.
Hynrei ha ka kylla miet ka Mylliem ka la khie im da ka rukom ïalehkai kaba kham khlaiñ. Ki lai ngut ki rangïalehkai, kata u Remark Kharmalki, u Shaibor Nongrum bad u Alem ki la pyni haduh katno ki lah ban long ka jingma ïa ka liang pyrshah da ka jingsted jong ki kaba pynlah ïa ki ban tam ïa ki rangïalehkai liang pyrshah jong ki man ka por.
U Shaibor u la ïoh ïa ka kabu kaba nyngkong hynrei u rangapdien ka Malki, u Fedrick Wahlang u la mareh pynstet ban beh nadien bad khanglad ïa ka jingpyrshang thep kol jong u Shaibor. Hynrei tang hadien shi minit u Shaibor u la pynbuh ïa ka bol kaba paka sha u Alem bad ym shym la don ba khanglad ïa une u striker, uba la long uwei na ki rangïalehkai ba sted tam ha ka SPL la katto katne snem mynta.
U Alem u la thep ïa kane ka kol sha liang kadiang lyngba u rangapkol ka Malki, u Franklin Surong bad pynjlan biang ïa ka kol lamkhmat hadien 10 minit. Ka bol pashat na ka corner kick jong u Remark ka la shem ïa u Alem, uba la pyndonkam da ka khlieh ban pyndei tiak sha kol.
Ka kol kaba lai ka la ïohi ba u Alem u la pyndonkam ïa ka jingstet jong u, ban tam bad ïaid lait ïa ki nongïalehkai ba shadien bad thep jlang ïa ka kol da ka kjat kamon.
Ka jingjop kamut ba ka Mylliem ka la kiew sha ka kyrdan ba san kum kawei na ki lai tylli ki kynhun kiba la kamai 4 poin, kiwei pat ki long ki lahduh barim jong ka SPL ka Langsning bad ka Rangdajied United.
Katba ka jingshah rem ka pynlong ïa ka Malki ban hiar sha ka thup kyrdan shah sloit (relegation zone), watla ka ïaryngkat bad ka Laitkor bad ka Sawmer. Ka Malki ka don ïa ka rekod kaba kham bha ban ïa ka Laitkor haba bishar ïa ki jingïakhun hapdeng kine ki arliang (head-to-head), kaba lah ban long kaba kongsan hadien, hynrei, katkum ka jingïapher kol, ki dei kiba duna tam na kine ki lai kynhun.
Ka jingïalehkai ha kane ka sngi, ha ka jingïakhun kaba nyngkong jong ka kylla kaba saw (Round 4), ka Rangdajied United kan aireng pyrshah ïa ka Nangkiew Irat, kaba bat mynta ïa ka kyrdan ba ha khlieh duh, ha ka por 4 shiteng janmiet.