Nongpoh, Nailur, 02: Ka jingïa kilan shipai ba la tip kum ka Joint Bilateral Military Exercise MAITREE, kaba dei ka sien kaba 14, hapdeng ka Indian Army bad ka Royal Thai Army, ka la sdang naduh ka 1 tarik Nailur 2025 ha ka Joint Training Node, Umroi. Kane ka jaka ka dei kaba la pynkhreh kyrpang ban ïaid ryngkat bad ka juk mynta. Kane ka jingïa kilan kan neh haduh ka 14 tarik Nailur.
Ha kane ka prokram, ki shipai na baroh ar ri kin ïashim bynta ha ki jinghikai bad jingkilan bapher bapher, ban pynkhlaiñ ïa ka sap ïakhun pyrshah ïa ki lehnoh bad ki nongshun kiba thmu ban pynwit ïa ka suk ka saiñ.
Ha katei ka jingkilan ki shipai Indian Army ki don kumba 120 ngut bala mihkhmat da ka Battalion of the Madras Regiment katba ki shipai Royal Thai Army ki don kumba 53 ngut bala mihkhmat da ka 1st Infantry Battalion, 14th Infantry Brigade.
Kumba la pyntip da ki heh shipai jong kine ki ar ri ha ka jingïalang bad ki lad pathai khubor ha Umroi, ka thong ba kongsan jong kane ka jingïa kilan ka long ban pynïaid shakhmat ka jingïadei paralok, ban pynneh ïa ka jingsuk jingsaiñ bad ban kyntiew ïa ka jingïatreilang ha ka liang ki kam ïada ri.
Ha kine ki 14 sngi, la buh ruh ki jingkilan ha ki jaka bapher bapher ban ïalehkai ïa ki buit ïakhun, khamtam ha ki jaka kiba kham eh, khnang ba ki shipai kin ïoh ïa ka jingtip kaba khraw bad jingmyntoi na ka jingïakylliang jingtip bad jinghikai hapdeng ki ar kynhun shipai ban ïakhun ïa ki kam sniew bad ki kam lehnoh.
