Ïam rangbah u Chairman ka Umlyngka Milk Society ha sngi plie u CM ïa jaka pynlang dud

Shillong, Jylliew 27 : U Chairman jong ka Umlyngka Primary Milk Producer Cooperative Society, Bah P Kharbteng u la ïam rangbah ha ka sngi ba u Myntri Rangbah ka jylla, Conrad K Sangma ryngkat u MLA ka thain, Bah Hamlet Dohling ki wan ban plie ïa ka Milk Collection Centre ne ka jaka pynlang dud kyrpang na bynta ka shnong Umlyngka.
Haba kren ha kane ka jingïalang, u Bah Kharbteng u la ïathuh ruh ba ha ki 32 snem mynshwa ba ki seng ïa katei ka kynhun ki kynduh shibun ki jingeh. Ka jingeh kaba khraw ba ki kynduh, la ong ba dei ka jingbym lah jong ka tnad ban siew ïa ka bai dud kaba la sahkut haduh san ne hynriew snem.”Hynrei dei ha u 2006 ba ka tnad ka la siew lut ïa ka bai dud baroh. Ka la long ka jingkmen kaba khraw ïa ki dkhot baroh namar ki la ïoh ban siew ïa ki ram ki shah baroh,” la bynrap biang u Kharbteng ryngkat ki ummat kiba tuid haba u kynmaw ïa ki jingïakhun ba ki hap ban ïaid lyngba ha kitei ki snem.
U la ïathuh ruh ba naduh ba ki seng ïa ka Society ha u 1990, ka jingthmu hi ka long ban pynshlur ïa ki nongshong shnong ban kin shim ïa ka kam ri masi ban long ka jingmyntoi ïa ka ïing ka sem ka imlang sahlang ha ka kamai kajih. Shwa kane u la ong, “Ha kaba sdang ngi die tang 20 litar shisngi sha ka Veterinary Department kata ruh ha ka dor kaba tang 4 tyngka shi litar. Hynrei mynta pat, ngi la lah ban pynmih haduh 4500 litar ha ka shisngi”
Ïa katei ka Centre kaba la tei ha ka jinglut kaba kot kumba 37 lak tyngka la tei lyngba ka skim kyrpang na u Myntri Rangbah kaba kot kumba 27 lak tyngka ba la tip kum ka Chief Minister’s Special Rural Development Fund (CMSRDF) kumjuh ruh na ka skim MLA kaba kot kumba 9 lak tyngka.
Shwa kane, u Myntri Rangbah u la ai ka jingïaroh ïa ki nongseng jong ka Society kaba ha ki lynti ïaid kiba eh ha ki 32 snem ba la dep hynrei kim shymla duh mynsiem pynban ki la nang ïai ïakhun bad tad haduh ban da long kumba ki long mynta.
“Haba u MLA jong phi u wan ban kynduh ïanga na bynta ka Society khlem pynslem nga la rai ban ai beit namar nga la tip ïa ka jingtreikam jongphi. Nga kloi ruh ban kyrshan na ka bynta ki jingdonkam ban pynheh shuh shuh ïa ka jingtei kumba phi la pynsngew lyngba u MLA khnang baphin lah ban ai jinghikai lang ym tang ïa ki nongshong shnong ka Umlyngka hynrei ïa ka jylla hi baroh kawei,”u la ong.
U Myntri Rangbah ha ka jingkren u ong ba kaei kaba ki ïohi ha kine ki saw snem ki jingtrei kum ka sorkar ka long ba ki paidbah ka jylla ki dei kiba trei shitom bad kiba thrang ban ieng ha la ki jong ki kjat. “Hynrei ha lynti ym don pat ba kyrshan ïa ki kaban ïarap ïa ki ba kin lah ban kyntiew shuh shuh ïa ka kam ka jam jong ki shakhmat. Kumta, kane ka jaka ba thylli kaba pynjngai bad khanglad ïa ki paidbah ban poi sha ka thong kadei ka jingeh ba kum ka sorkar kim shym la lah satia ban peit la slem bha.”
Shuh shuh u la ong, “Kumta hadien ba ngi la wan ha ka bor, ngim kwah shuh ban leh kano kano kaba thymmai hynrei ngi shu buddien bad wad kaei kaba ki paidbah ki kwah bad kaei kiba donkam. Kumta, ngi peit hangno donkam kyrshan da ka bor pisa, ki kor ki bor lane da ka jinghikai khnang ba kin lah ban pynjanai ïa ka kam ba ki trei.”
Na ka liang u MLA u ong ba ka jingdon jong katei ka Society ka long ka burom kaba khraw ïa ka thain baroh kawei namar kiban wan ban jurip bad wan jngoh ïa ka rukom treikam jong ki, ki wan ym tang na kylleng ki ri jong ka pyrthei ruh.
“Ki la ïoh ïa ka lad ban ïohi markhmat ïa ka kam ba ka Society ka leh bad ïaroh ruh ïa ka jingtreikam jong ki. Naduh ka sorkar India, bad ki kynhun bapher bapher ki la ithuh ïa ka jingtreikam jong ki. Kumta kadei ka kamram jongnga ruh ban shim lang ïa ka jingkitkhlieh na bynta ka jingdonkam jong ki,” u la ong.
U ong ruh ba kane ka Society kan dei pateng na ka bynta ki khun ki kti jong phi kaban kyrshan ïa ki ïing ki sem jong ka Society bad kan pynshlur ruh ïa ki bahadien ban bteng ïa kane ka kam kaba donburom ha ka imlang sahlang.
Ha kane ka sngi la donlang ruh ki ophisar jong ki tnad bapher bapher