Nongpoh, Nailar 28: Hadien ka pyntip na u EE ka tnad PWD (Roads) Nongpoh Division, Ri-Bhoi District lyngba ka shithi bala phah haka 14 tarik Nailar 2025 ba kawei ka jingkieng kaba don ha u surok na Mawskei sha Mawdem kala pra namar ka jingïaid jong ki trok kit palat pud wat hadien bala thoh shai da ka signboard bym shah ban ïaid kali kit khia, haduh ba katei ka jingkieng kala don hapdeng ka jingma ïaki paidbah ba leit ba wan.
Katei ka jingbym kheiñ snep jong ki trok kit palat pud ban ïaid lyngba utei u surok kala pynlong ïa u surok ban jot bad katei ka jingkieng kala long ka jingma ïaki paidbah ba leit ba wan, kumta naka liang u District Magistrate ka Ri-Bhoi u Abhilash Baranwal kumba la pynkup bor hapoh ka kyndon 163 BNSS, 2023 u la pynmih syndon da ka hukum bad pynjari da ka kyndon aiñ ba tyngeh pyrshah ïaki trok kit khiah kiba ju ïaid lyngba utei u surok Mawskei sha Mawdem bad lada lap ïa kiba leh pyrshah kin ngat haka kyndon aiñ 223 jong ka Bharatiya Nyaya Sanhita bad la bthah ruh ïaki pulit ka Ri-Bhoi, EE ka tnad PWD (Roads) Nongpoh Division bad ïa u District Transport Officer ban pyntreikam ïa katei ka hukum.
