Nongpoh, Nailar 27: Kawei ka kynhun jong ki 6 ngut shiparalok kaba la jer kyrteng kum ka “ïarap ban kner” haka sienjam ba nyngkong bad hapdeng ka jingkmen mynta ka sngi ki la ioh ban aiti syndon da ka iing thymmai ban lait na ka sngi u slap sha kawei ka longkmie kaba shempap bad shem lanot haka shnong Nongpoh Proper.
Katei ka kynhun jong shiparalok ki samla na ka thaiñ Nongpoh ba la lam khmat da u samla Rapbanker Sohtun kadei kawei na ki kynhun treimon sngewbha jong ki khun samla kaba don ruh ïa ka thong ban kner ïa ki jingïarap sha kiba donkam bad ki la leh ïa katei ka kam ba bha hadien ka jingiohi ïa ka jingjynjar jong katei ka longkmie kaba la tip kyrteng kum ka kong Wanphai Kshiar kaba don ruh 4 ngut ki khun, bad ki la sdang ban shna hi ïa katei ka iing naduh u snem ba la dep tad haduh ban da ioh ban aiti syndon mynta ka sngi da ka kong Rona Khymdeit MDC ka Nongpoh kum ka kongsan.
Ha katei ka sngi ka jingaiti ïa katei ka iing thymmai la sakhi ruh da ka jingdonlang ki nongïalam ka Dorbar Shnong Nongpoh, u Samla Rapbanker Sohtun kum u nongïalam bad kumjuh ruh ka kong Wanphai Kshiar lem bad ki bahaiing hasem jong katei ka longkmie.
Ïa katei ka iing la lah ban pyndep lyngba ka jingsynñiang pisa hi kitei ki shiparalok ban thied ïa ki tiar ki tar ryngkat ka bor met ban trei bad ban pyndep ïa katei ka iing ba kum u samla u don ruh ïa ka YouTube channel kaba la ai kyrteng RBK Sohtun bad lyngba kane ka Chanel u la ioh ruh ban kyrshan pisa hakaba ïa dei bad ki jinglut jingsep ban tei ïa katei ka iing.
Haba kren sha ki lad pathai khubor na ka liang u samla Rapbanker Sohtun uba dei ruh u nongïalaam katei ka kynhun u la ïathuh ba kum ka kynhun ki shiparalok ki la lap ba katei ka longiing jong ka kong Wanphai Kshiar ka dei shisha kaba donkam ka jingïarap namar baroh shi kata katei ka longkmie ryngkat ki khun ka shong ka sah ha kawei ka iing ba jot rathai bad ba kum ka iing ka mad jingeh kaba khraw khamtam haka por slap namar ka jingjot jingpei, hynrei kum ka kynhun ki la ioh ban ïakren bad katei ka longkmie ka bym don shuh u kpa u kum u nongkyrshan bad dei hadien katei ka jingshem pap kum ka kynhun ka la shim ïa ka rai ban pynshna da ka iing kum ka kam leh isynei bad ban sdang ïa katei ka kam naduh u snem ba la dep da ka bor met bad ka bor pisa katba lah ei.
U la ong ruh ba kum ka kynhun ba dang dei ruh tang ki samla pule ki shem jingeh ban pynmih pisa hynrei kim shym la sangeh bad kynran dien ban trei borbah da kaba leit ban trei hi ban pyndep ïa katei ka iing.
Na ka liang ka kong Wanphai Kshiar ka la pynpaw ka jingsngewnguh nyngkong ïa u Blei u ba la pasiaw sha ki shkor kitei ki samla kiba la kloi ban ïarap ban pynshna ïa ka iing, khamtam kum ka longkmie kaba duk ba kyrduh bad kaba shempap hynrei kitei ki samla da ka mon ba laitluid ki la mih bad met bad mynsiem ban pynshna ïa katei ka iing ban ioh ban shong ban sah bad ban lait na ka sngi u slap bad duwai ruh ba u Blei un dang kyrkhu ïa kitei ki samla watla ka dei tang ka jingsdang jong ki hynrei ba kin dang lah ban leh ïa ki kam ba bha bad ki kam isynei na ka bynta kiba duk ba rangli bad kiba donkam shisha ka jingïarap.
