ïaroh u CM ïa ki jingtrei ki Ophisar, ai jingkheiñ ki tnat treikam ha ka Cabinet Retreat

Shillong, Nailar, 26: Ki kam radbah jong ka Sorkar Meghalaya Democratic Alliance-II (MDA-II) ki la paw ha ka Cabinet Retreat kaba la long ha ka sngi Baar ha nongbah Shillong da ka jingai jingkheiñ thik pa thik ki tnat treikam ka Sorkar ka Jylla.
U Myntri Rangbah ka Jylla Conrad K Sangma haba kren ha ka jingïalang u la pynkynmaw ïa ka Cabinet Retreat kaba nyngkong kaba la long ha Sohra bad u la batai ba ka jingai jingmut na ki ophisar Sorkar kiba pynpaw kumno ka jingbun kam ka pynmih ïa ki jingïakren kiba don jingmut, kaba la pynlong ïa u ban kynthup ïa ka kynhun kaba kham heh ha ki jingïalang kiba hadien.
Ka Cabinet Retreat ka la pyni ïa ka jingkular jong ka jylla ban wanrah ïa ka jingsynshar kaba kham bha na ka bynta ki jingmynti jong ki nongshong shnong bad ka jingpynroi ïa ki buit treikam, u la ong.
U Sangma u la batai ïa ki thong jong u da kaba sdang ïa ka jingpynïadei ïa baroh bad ka jingthmu jong ka Jylla.
U la ban jur ban pynthikna ba ka jingthmu jong ka Sorkar ka long ban poi sha ki paidbah shaduh ba kut ka jylla.
Nalor kata, u Myntri Rangbah u la pyntip ba ka Academic Session jong ka Shillong Medical College kan sdang naduh u bnai Risaw 2025 bad ka Sorkar Jylla ka dang ap ïa ka jingmynjur na ka National Medical Commission (NMC).
U Myntri Rangbah u la kyntu ïa baroh ki ophisar ban pyndonkam ïa ka CM CONNECT ban ithuh bad weng ïa ki jingeh kiba lah ban mih ha ka rukom kaba biang. Ki Village Data Volunteers (VDV) ki don ka bynta kaba kongsan ha kaba pynbeit ïa ki jingeh jong ki paidbah, ban pynbha ïa ka jingshakri, bad ban kyntiew ïa ka jingïatreilang jong ki paidbah. Ka prokram CM CONNECT, kaba la pynïasoh bad ka Meghalaya One portal, ka pynsuk ïa ki jingbishar paidbah bad ka jingpynrung kyrteng ïa ki jingeh ha kylleng ki hynñiew tylli ki block ba la kyrshan da u nombar ai jingïarap ba khlem jingsiew, 1971.
Ha ka Technical Session, u Myntri Rangbah u la pynpaw ba ka jingbei tyngka ha ki samla na ka bynta ka lawei kaba bha ha kaba ïadei bad ka jingpynmih ïa ki kam ki jam da ki jingthmu kum ka CM Elevate, PRIME.
Ha kaba ïadei bad ka pule puthi, u Sangma u la kdew ba ka Class-1 bad Clas-2 ruh ka dei ban don ïa ka Play Based Pedagogy kaba ïasyriem bad ki Anganwadi Centre.
U la ban jur ba ka jingpynroi ïa ki jingdonkam na ka bynta ki samla ha ka jingïalehkai, ka pule puthi, bad ka kam ka jam ka long kaba kongsan namar kan pyndap ïa ki samla ki ban sa san ha ki 10 snem ban wan bad kin donkam ïa kine ki jingshakri.
Ka jingïalang ka la sdang da ka jingpynbeit ïa ka jinglong jingman da ka Department of Planning, Investment Promotion and Sustainable Development kaba la ai ïa ka Kaiphod ba la leh halor ki rai jong ka jingïalang kaba nyngkong.
Ka tnad ka la banjur ïa ka jingthmu ban wanrah ïa ki buit treikam kiba kham heh kumno ban kynjoh sha ka thong.
Kum ban pyntip, ka jingïalang kaba mynshuwa ka la batai ïa ki 107 tylli ki thong treikam, ha kaba 27 tylli la khang, 72 tylli ki dang ïaid shakhmat bad kiba sah la buh ban bishar bniah hapoh 2–3 bnai.
Ka Meghalaya One online portal, kaba don palat 7,000 ngut ki nongpyndonkam, ka don ïa ka Dashboard kaba kyrpang na ka bynta ban buddien ïa ki mat, ryngkat ki kam ba la aiti ha ki Nodal Officer. Kane ka jingkylla ha ka Digital ka buh ïa ka Meghalaya kum kawei na ki Jylla ba la pyndonkam bha ïa ka Digital ha India.
Ka jingïalang ka la pynleit jingmut ha ka DC CONNECT bad ha ki Key performance Indicators (KPI) kiba pynskhem ïa ka jingkular jong ka Meghalaya ha ka jingsynshar ba la pynshong nongrim ha ki jingtip bad ka jingïatreilang hapdeng ki tnad, ban pynthikna ba ki jingthmu ki long kiba kynthup lang, kiba ïahap bad ki thong ba kongsan jong ka Jylla ha ka liang ka ïoh ka kot bad ka imlang sahlang. Ka jingpynkut bad pynlong thikna ïa ki KPI na ka bynta ka Mishon-10 kum ka lad ban ïaid shakhmat.
Ha kawei ki sienshong jingïalang, u Myntri Rangbah ryngkat bad ki Myntri ki la pyllait paidbah ïa ka HDLP Joint Field Visit Guide.
U Chief Secretary ka Jylla Bah Donald Philips Wahlang ha ka jingkren jong u, u la kdew ïa kane ka jingïalang mynta ka sngi ‘kum kawei ka rynsan ha ka ri” ha kaba ha kawei ka kamra, naduh u Myntri Rangbah haduh ki BDO, kiba long ki khmat bad ki shkor jong ka Sorkar baroh ki ïashong lang. U la kyntu ba dei ban bteng bunsien ïa kane ka jingïalang.
Ka tnat Social Welfare ka la wanrah ïa ka Human Development Leadership Programme (HDLP), kaba long ka jingthmu ba la sdang da ka Sorkar. Manla ka taiew, ki kynhun na ki block kiba kynthup ïa ki dkhot na ka tnad ka Koit ka Khiah, ka Social Welfare, ka tnat Pule Puthi, bad ka tnat Community & Rural Development ju ki pynlong ïa ki jingleit jngoh da kaba ïatreilang.
Ki jingïathir sani ki long da ki jingai jingmut ban pynbha bad pynjanai kham bha kiba kynthup ïa:
Ka jingïatreilang hapdeng ka tnat Social Welfare, Health & Family Welfare, Community & Rural Development bad Education ki la pynpaw ba kumno ki la leh katba lah ban wanrah ïa ka jingpynbiang ïa ki jingbam teimet, ka jingsan jong ki khynnah rit bad ka jingthmu ba dang ïaid lynti shakhmat.
Ka tnad ka Koit ka Khiah ka la batai ïa ki sienjam ban kyntiew ïa ka jinglah ban ïoh lyngba ki jingpynkylla ba dang shen.
Ka tnad Planning and Sustainable Development ka la bishar bniah ïa ka jingkiew jong ka Jylla halor ki SDG ba kongsan bad ki buit treikam ban ïatreilang.
Ka tnad Pla Tyngka bad ka tnat Planning ki la pyni halor ka jingpynbeit ïa ki jingmynjur ïa ki skhim, ka jingpynïaid ïa ka jingkitkhlieh bad ki rukom ai jingbit.
La ïakren ruh halor ka rukom pynthymmai ïa ki rukom treikam, da kaba phaikhmat sha kiba kham don sap, ka jingpynskhem ïa ki nongtrei ba treikam shipor, bad kiwei kiwei.
La shim ruh ïa ki lad ki lynti kiba thymmai ban pynjanai ïa ki jingtreikam ba la pyni da ka tnat Planning, Investment Promotion, and Sustainable Development.
Ka tnat Public Works bad IT ryngkat bad ka tnat Housing bad Urban Affairs ki la ai jingtip ïa ka jingkiew hapdeng ki tnad ha kaba ïadei bad ka jingpynïasoh ha ki nongkyndong, ki jingtei digital bad ki skhim shna iing kiba rem dor.