Nongstoiñ, Nailar, 22: Ka jingïai bteng jong ka sorkar Assam ban khynra ïa ki mynder kiba dei na ka ri Bangladesh, kiba wan rung sha ka jylla ban kiba shong beaiñ ha kiba bun ki jaka ba kynthup ruh ïa ki jaka sorkar, ki nongïalam ka Hynñiewtrep Youth Council West Khasi Hills District, mynta ka sngi ki la dawa na ka sorkar ba ka dei ban buh bad pynkhlaiñ bad buh da kawei ka khyrdop talasi mynder (Infiltration check gate) mar mar ha Shallang bad Langpih.
Ki dkhot ka seng hynne ka sngi ki la leit ban ïakynduh ïa u Officer Incharge jong ka Police Infiltration Check Point kaba don ha Athiabari, ban ai mynsiem ïa u bad ki staff ba kim dei ban aili ne pyllait ïa kino kno ki bar jylla ne ki mynder ba kin rung shapoh u pud u sam jong ka West Khasi Hills. Wat lada ki don ïa ki kot ki sla ban pynshisha ba ki dei ki nong India ruh lada ki dei kiba ishan khmat kim dei ban ai lad.
Ki nongïalam ka seng ki la kyntu ruh ïa kitei ki pulit talasi mynder ba kin ai ka jingïatreilang ha baroh ki bynta naduh ki bor shnong, ki sengbhalang bad kiwei, khnang ba ki mynder kin ym ïoh lad ban rung sha ki jaka jong ka West Khasi hills.
U samla Distarborlin Wanñiang Vice president ka HYC West Khasi Hills haba ïakren bad ki lad pathai khubor, u la ong ba ha kaba ïadei bad ka jingpeitngor bad ka jingkhanglad ïa ki mynder kiba shah kyndang na Assam ba kin ïoh lad ban wan rung hapoh ka jylla, ki nongïalam ka seng ki la leit ban ïakynduh ruh ïa u Deputy Commissioner bad u Superintendent of Police jong ka West Khasi Hills.
Ki la ai ruh da ka jingthoh ban kyrpad ïa ki ba kin pynsngew sha ka sorkar ba ka dei ban pynkhlaiñ bha ïa ka tnad pulit Infiltration, ban talasi ïa ki mynder kiba wan rung beaiñ hapoh ka jylla lyngba ki bynta bapher bapher kiba don ha ki thaiñ khappud.
Ha kajuh ka por utei u nongïalam u la ong ruh ba na ka liang ka seng ka dawa na ka sorkar ba kan buh khyrdop talasi mynder ha Shallang bad ha Langpih.
Ha kaba ïadei bad ka jingdawa ban buh khyrdop talasi mynder ha Shallang, u la ong ba kumba ka long baroh shikatta, ki mynder ki ïoh lad bha ban rung sha West Khasi Hills lyngba ka surok bah National Highway 44(E) Shillong-Tura, namar ba ha Shallang ki don ki karkhana tang dewïong nalor kata wat ki nongshong shnong ruh la bun da ki bar jylla ban ïa ki trai jylla bad dei halor katei ka nongrim ba wat ki Dkhar na Bangladesh ruh ki ïoh lad bha ban wan kiew sha Shallang.
Nalor kata u la ong ruh ba ha kaba ïadei bad ka jingdawa ban buh khyrdop talasi mynder ha Langpih pat, ka dei namar ka jingbun jong ki Nepali bad ka jingdon jong ki katto katne ki Muslim kiba wan die jingdie ha Langpih man la ka sngi ïew, ka dei ka lad bad ka kabu ïa kito kiba shah kyndang na Assam ba kin ïoh ban rung.
Kumta wat lada ka thaiñ Langpih ka dei ka jaka ka bym pat lah ban ïa pynbeit ruh, ka sorkar kam dei ban ai lad ïa ki mynder ba kin wan rung, namar shisien ba ki la ïoh ban bsut ïa ka khlieh ka la eh ban pynmih ne beh noh ïa ki hadien.
