Shillong, Jylliew 27 : Ka Mawlai SC ka la jop da kaba pynliem da 2-0 ïa ka Langsning FC ha ka lympung ïalehkai OC Blue Shillong Premier League 2021-22 ha ka jingïalehkai ha ka sngi Nyngkong ha madan Third Ground, Polo, Shillong.
Ka jingïalehkai hapdeng kine ki ar tylli ki team ka long kaba ïakhaid bha, naduh kaba sdang ki la ïakhun tyngeh ban thep kol hynrei ka jingïakhun ha ka kylla step ka la kut noh khlem da don ba lah ban pynkhih jar. Haba wanphai sha ka kylla miet, ka jingïakhun ka la nang ïathnem da kaba ïoh ban pynsmiej mar kylliang ban ïa thep kol. Dei ha ka jingïalehkai ba la ïaid 77 minit ka Mawlai SC ka la ïoh ban ïalehkmen lyngba ka kol ba thep da u Fullmoon Mukhim. Bad lyngba katei ka shi kol ka kynhun ka la ïoh mynsiem ban ïakhun beit triang khlem da ailad ïa ka Langsning ban pynphai kol.
Ki minit ïalehkai ki la nang ïaid, ka jingïakhun ruh ka la nang jur bha hapdeng kine ki ar tylli ki team. Ka Langsning ka la ïoh ki katto katne ki kabu hynrei ka khlem lah pat ha ka liang ka thep kol, kaba la nang ai mynsiem ïa ka Mawlai bad ka la ïakhun tyngeh ban pynthikna ban khur ïa ka nam jop. Bad lyngba kane ka rukom ïalehkai ha ka minit ba 89 u Pynbha Suting u la thep ïa ka kol kaba ar na bynta ka Mawlai SC kaba la khur syndon ïa ka jingjop.
Lyngba kane ka nam jop, ka Mawlai SC ka la kiew sha ka kyrdan ba nyngkong ha ka miej kheiñ point da kaba khur 6 point. Ka Mawlai SC ka la jop ha ka jingïakhun ba nyngkong katba ha ka jingïakhun kaba ar pyrshah ïa ka Shillong Lajong la hap ban pynsangeh noh shwa na ka daw ka jinglang um ka madan ha kaba kan sa bteng biang ban ïakhun ïa ki minit ba dang sah kaban long ha ka 1 tarik Naitung.
Katba ka Langsning kaba la jop ha ka jingïalehkai kaba nyngkong bad ïakhaid ha ka sien kaba ar bad rem noh ha kane ka jingïakhun kaba lai ka kamai 4 point.
