Da ka Peace Committee thaw ki bor district Ri-Bhoi bad Assam ban tem ïa ki jingkynad ha khappud

Nongpoh, Nailar, 19: Hadien ka jingïakynad kaba la mih na ka por sha ka por ha ka thaiñ Maikhuli ka shnong khappud ka Meghalaya bad Assam hadien ka jingwan thung ka Assam State Electricity Board ïa ki post elektrik ha ka shnong Maikhuli kaba don mynta hapdeng ka jingkajia pud, ki bor synshar district jong ka Ri-Bhoi bad ka Kamrup District ki la thung syndon da ka Peace Committee ban pynneh ïa ka shongsuk shongsaiñ ha katei ka jaka bad khamtam ban tem ïa kino kino ki jingkynad kiba lah ban mih ha kano kano ka por.
Kum ban shu kdew hangne ba ka jingïakynad ka la mih ha katei ka jaka dei hadien ba ka Assam State Electricity Board ha ka shnong Maikhuli ha ka jylla Meghalaya ba kum ki paidbah nongshong shnong ki la pynpaw ka jingbitar bad ka jingpyrshah jur da ka jingthmu jong ka Assam ban klun jubor ïa katei ka jaka haduh ba la mih ka jingïakynad bad wat ka jingpynibor hapdeng ki paidbah nongshong shnong ka Maikhuli bad ki paidbah na Assam.
Haba kren sha ki lad pathai khubor na ka liang u Deputy Commissioner ka Ri-Bhoi District u la ong ba hadien ka jingkynad kaba la mih ha katei ka jaka na ka liang ki bor synshar district ka Meghalaya bad Assam ki la shimkhia ban phah ruh ïa ki majistor sha katei ka jaka bad khamtam ban kyrpad ïa ki paidbah ba kim dei ban pynmih kano kano ka huri hura ne ka jingpynibor kaba ktah pat ïa ka shongsuk shongsaiñ ki paidbah.
Kum u khlieh ka district u la kyrpad ruh ïa ka Assam ba ka dei ban burom ïa ka Status Quo ba la mynjur hapdeng ki ar jylla ki la rai ruh ban thung syndon da ka Peace Committee ha kaba mar 8 ngut kin long dkhot na Meghalaya bad Assam ban pynneh ïa ka shongsuk shongsaiñ ha katei ka thaiñ lada mih kano kano ka huri hura dei katei ka committee ka ban tem ïa ka jingkynad ba kan nym heh bad ktah ïa ka shongsuk shongsaiñ ki paidbah.