Shillong, Nailar 19 : Ki rephri ka Shillong Sports Association, ki la hap ban pynsangeh noh shi syndon ïa ka jingïakhun ha ka lympung ïalehkai Second Division ha kane ka sngi Ba-ar shwa ban sdang artad ka jingïakhun na ka daw ka jingther jur u lapbah haduh ba shi bynta jong ka madan kaba ju shong u Fourth Referee bad ki rangïalehkai ka la at bad lang um.
Ha kane ka sngi, ka jingïakhun kadei ban long hapdeng ka Mylliem Lum SC pyrshah ïa ka Lumshyiap SC ha ka por 12:15 baje mynsngi.
Na ka liang ki rephri ki la ïathuh ba ka jinghap ban pynsangeh noh ïa ka jingïakhun kadei namar ba ki ïohi ba ka madan ka dap um bad don pat ka jaka ba at kumta ki la shim ïa ka rai kaba long ruh shi bynta ka jingshngaiñ jong ki nongïalehkai.
Hadien kane ka jingïakhun, katkum ka prokram, la buh ban don sa kawei pat ka jingïakhun kaba dei ruh ka quaterfinal jong ka SSA SRGT Third Division Football ban ïakhun hapdeng ka Mawkriah West SC pyrshah ïa ka Ïaityllilang SC ba la thmu ban pynlong ha ka por 2:45 baje nohphaisngi. Ha kane ka jingïakhun ruh ki bor pynïaid ki la hap ban shim ïa kajuh ka rai namar kim i nud ban pynïalehkai.
Kumta halor kane, na ka liang u President ka Shillong Sports Association, Bah Banteidor Lyngdoh uba dei ruh u MLA ka Mawkynrew u la ïathuh ba ka daw jong ka jingdap kynsan ka umslap kadei namar ba la set ïa ka nala um kaba dei ban tuid ka um na madan. Shuh shuh u ong ruh ba mynta ka madan kam lei lei shuh bad ïa ka jingïakhun kaban wan yn bteng katkum ka prokram.
